Бу таас дьиэ куорат арҕаа өттүгэр турар. Былырыын бэдэрэээччит эбэһээтэлистибэтин толорбокко уларыйбыта.
Түөрт подъезтаах дьиэни “Кинг-95” тутуу тэрилтэтэ быйыл бүтэрэр соруктаах. Тутааччылар бары – Арменияттан кэлбит дьон. Кинилэр бу күннэргэ өрөбүлэ суох үлэлииллэр. Үс этээстээх дьиэ тас өттүн бүрүөһүнүн бүтэрэллэрэ чугаһаата. Базальт боолдьоҕунан тилэри үүйүллүбүт истиэнэни, ууга-уокка бэриммэт матырыйаалынан бүрүйэллэр. Маны сэргэ уталыппакка, дьиэ ис бараанын үлэтэ саҕаланна. Ол эбэтэр, дьиэ баттыгын бөҕөргөтөллөр, кыбартыыралар ис өрүттэрин ситэрэллэр-хотороллор.
Манна сүрүннээн биир, икки кыбартыралаах дьиэлэр баар буолуохтара. Биир хостоох кыбартыыра иэнэ 36 кв м, икки хостоох дьиэ иэнэ 48 кв.м буолара былааннаммыта. Бу дьиэ тутуллубута икки сыл буолла. Сотору дьиэ иннигэр подстанция баар буолуо. Тутааччылар дьиэ инженернэй хааччыллыытынан дьарыктаныахтара. Ааспыт сылга бэдэрэээччит уларыйан, дьиэ тутуутун “Кинг-95” тэрилтэ илиитигэр ылбыта. Былаан быhыытынан, бу дьиэ быйыл тутуллан бүтүөхтээх. Манна хаарбах туруктаах дьиэлэртэн дьон олохсуйуохтаахтар.
Станислав Алексеев, Мииринэй куората. Ааптар хаартыската.
