Мииринэй куоратыгар бүгүҥҥү туругунан 400-чэ дьиэ атыыга турар. Онтон бэрт аҕыйах дьиэ атыыланар. Дьиэлэрин, баайдарын-дуолларын атыылаан, соҕуруу көһөр былааннаах дьон дьиэлэрэ кыайан атыыламмакка кыһалҕаҕа ыллардылар.
Атыылаһааччыны алы гына сатаан, кыбартыыраларыгар гараажтарын, даачаларын, массыыналарын, эбии сыбаан кутугунайааччы үгүс. Урут Сунтаартан, Ньурбаттан кэлэн өс киирбэхтэригэр бас быстар сыанатыгар кыбартыыра атыылаһааччылар. Билигин отой атын хартыына. Дьон сыта-тура, төгүрүччү толкуйдуур буолан турар. Үп-харчы татыма да бэрт.
Сунтаардар Заречнай түөлбэтин кытыытыгар учаастактары атыылаһан, чааһынай дьиэлэри тутталларын ордороллор.
Орто Азия, Бүрээтийэ дьоно куорат адьас аттыгар: Комсомольскай, Бабушкин, Гагарин уулуссаларыгар учаастак атыылаһан дьиэ тутталлар. Кинилэр оҕуруот олордор тиэргэннээх, гараажтаах, баанньыктаах, теплицэлээх, балачча кэмҥэ олорорго тэринэллэр.
Мииринэйдэр дьиэ атылаһааччыта суох хаалан отоойкоҕо олорон эрэллэр. Ол да иһин сыана түһүө диэн сылыктаабыттара. Онтулара туолла. Холобур, 3 хостоох дьиэни урут биэс мөлүйүөҥҥэ атыылаһар буоллахтарына, билигин төрүт да наадыйбаттар. Тоҕус этээстээх КПД дьиэҕэ, 2 хостоох кыбартыыраны - 4 мөлүйүөҥҥэ сыаналыыр эбит буоллахтарына, билигин 3 мөлүйүөҥҥэ диэри түстэ.
Хайдах да евроөрөмүөннээ, килэрит-халарыт – сыана – атыылаһааччы баҕатынан.
Урут, 1 хостоох «малосемейка» - 2 мөл.300 тыhыынча – 2 мөл 500 тыһыынча солкуобайга атыыга барара. Билигин ол уурайан турар. 21, 30 кв.м. иэннээх «малосемейкалар» атыыга кыайан барбакка, ыйы-ыйынан, сылы-сылынан тураллар.
Аны, дьиэ куортама. Сыаната, Дьокуускайы кытары, араа-бараа диэххэ сөп. Куорат киинигэр биир хостоох таас дьиэ биир ыйга куортама – 25 тыhыынча. Биир хостоох, уулаах-хаардаах мас дьиэ куортама – 17-18 тыhыынча. Уопсайга хос куортама – 15.000 солк. Аны туран, кыбартыыраны, бэл кииннэммит ититиилээх, уопсай туалеттаах хоhу да дэбигистик кыайан булбаккын! Дьэ, бу боппуруос!
Ону, бу диэки, Мииринэйгэ кэлээри сорунар дьон бука диэн учуоттааҥ.
Станислав Алексеев, Мииринэй куората. Ааптар хаартыскалара.
Сэҥээриилэр