Икки куорат дьахталларыгар холуобунай дьыала көбүтүлүннэ. Силиэстийэ быһаарбытынан кинилэр омук дьонун Арассыыйаҕа олохсутарга бөлөҕүнэн куомуннаһан, судаарыстыбаны албыннаан, сокуону утары барбыттар, диэн иһитиннэрэр Арассыыйатааҕы ФСБ Саха сиринээҕи салаата.
28 уонна 31 саастаах, Кэбээйи, Абый улуустарыттан төрүттээх эдэр дьахталлар, харчы манньаҕа хас да төгүл Таджикистан гражданнарын кытары, бииргэ олорбот эрээрилэр, кэргэн тахсыы туһунан сымыйа докумуоннары ЗАГС-аҕа оҥотторбуттар.
«Арассыыйа гражданкаларын өҥөлөрүнэн, Аллараа Бэстээххэ уонна Дьокуускайга сокуоннайа суох сылдьар омук дьоно туһаммыттар. Кинилэр миграционнай уорганнарга бу дьахталлары кэргэн ылбыттарын туһунан сымыйа свидетельство туттараннар, быстах кэмҥэ олороллоругар көҥүл ылаллар эбит», - диэн этиллэр иһитиннэриигэ.
Баҕалаах көҥүллэрин ылан бараннар, омук дьоно бу дьахталлары кытта тута сокуонунан арахсаллар эбит, оттон «кыргыттар» тута саҥа «оҕонньор» көрдөөн бараллар эбит.
Саха сирин борокоротуурата буруйдааһын түмүгүн бигэргэтэн, холуобунай дьыаланы суут көрүүтүгэр ыытта.
