Мииринэй улууһун Сүлдьүкээр нэһилиэгин баһылыга Иван Оюров суругун ити курдук, “сүһүөхтээх бэйэбит сүгүрүйэбит” диэн истиҥ, махтал тылларынан, саҕалыыр.
— Төрүт олохтоох эбэҥкилэр түөлбэлээн олорор нэһилиэктэриттэн, Сүлдьүкээртэн (Мииринэй улууһа), чугас уот туран, олохтоохторго улахан куттал суоһуу сырытта, — диир кини. — Бэс ыйын 22 күнүттэн 26 күнүгэр диэри бэйэбит күүспүтүнэн ойуурга турбут уоту умуллара сатаабыппыт. Олохтоох эр дьон барахсаттар кырдьаҕастыын-эдэрдиин бары турунан, баһаары умулларар туһугар сыраларын-сылбаларын бараатылар, ис сүрэхтэриттэн кыһаллан-мүһэллэн үлэлээтилэр. Бэл, далбар хотуттарбыт уонна кэрэ кыргыттарбыт эмиэ туора турбатылар. Кинилэр күннэри-түүннэри уоту утары киирсэ сылдьар дьонноругар-сэргэлэригэр анаан тиһигин быспакка ас-астаатыларн, барыларын хааччыйдылар. Уопсайынан, бу курдук уустук быһыы-майгы тирээн кэлэр күнүгэр, Сүлдьүкээр дьоно-сэргэтэ, нэһилиэнньэтэ олус түмсүүлээҕин көрдөрдө, илэ-чахчы туоһулаата.
Дьон туох да күһэйиитэ суох, бэйэлэрин үтүө баҕа санааларынан араас тиэхиньикэнэн, сэбинэн-сэбиргэлинэн көмөлөстүлэр. Бэйэбит сүгэ сылдьан уоту умулларарга аналлаах 26 тэриллээх этибит. Хата, кэлин мииринэйдэр оннук 25 тэрили эбии ыытан, санаабытын бөҕөргөппүттэрэ.
АЛРОСА аахсыйалаах хампаанньа куһаҕан суолтан-иистэн иҥнибэт, үтүө сырыылаах вездеходтары уонна биһиги алдьаммыт вездеходтарбытыгар саппаас чаастары ыытан, эмиэ улаханнык абыраата. Итини таһынан, ыаллыы сытар Светлэй бөһүөлэгиттэн уонна Мииринэй куоратыттан бу күүдэпчилэ турар уоту умулларсаары эбии дьон-сэргэ бөҕө кэлэн, ыксаллаан күннэрбитигэр олус улаханнык өйөөтүлэр, кыһалҕабытын тэҥҥэ үллэстэр бигэ тирэх буоллулар.
Ол курдук, бар дьон күүһүнэн бэс ыйын 28 күнүгэр барыта 22 килэмиэтир усталаах ханааба хаһыллыбыта, баһаар уотун сөҕүрүтэргэ сөҕүмэр үлэ-хамнас күөстүү оргуйбута. Ити сындалҕаннаах күүс, хары үлэтиттэн ким даҕаны туора туран хаалбатаҕа. Оту-маһы, ийэ айылҕаны ньылбы салыыр кытара кытыастары утары бука бары солбуйса сылдьан күнүстэри-түүннэри тохтоло суох үлэлээбиппит.
Төһө да үлэлээбиппит, кыһалла сатаабыппыт иһин от ыйын 13 күнүгэр олус күүстээх балаһа тыаллар түһэннэр, уот мастар чыпчаалларын, үөһээ өттүн өрө салаан барбыта. “Верховой” дэнэр олус кутталлаах баһаар саҕаламмыта, бөһүөлэккэ олох субу ынан кэлбитэ. Инньэ гынан ыксаллаах быһыыны-майгыны биллэрбиппит.
Ити курдук иннибит-кэннибит биллэбэккэ турар ыксаллаах кэмигэр Саха сирин Ил Дархана Айсен Николаев бэйэтинэн тиийэн кэлбитэ. Кини Мииринэйгэ кэлээт, балаһыанньаны илэ-чахчы билсэн баран, үөһээттэн ууну кутар сөмөлүөттэри ыыттарбыта, Арассыыйа Ыксаллаах быһыыга-майгыга министиэристибэтиттэн 43 байыас кэлэрин ситиспитэ. Итини сэргэ Айсен Сергеевич олохтоохтору кытта көрсөн, ирэ-хоро кэпсэтэн, барыбыт сүрэҕин уоскуппута, улаханнык үөрдүбүтэ. Ити курдук ыксаллаах түгэҥҥэ биһиги бэйэбитин кытта бэйэбит эрэ хаалбатахпыт.
Түгэни туһанан, Ил Дархаммыт Айсен Сергеевичкэ Сүлдьүкээр бары олохтоохторун аатыттан ис сүрэхпититтэн махтанабыт, улахан көмөтүн иһин сүһүөхтээх бэйэбит сүгүрүйэбит, хоолдьуктаах бэйэбит хоҥкуйабыт! Бар дьоҥҥор мэлдьитин даҕаны бу курдук суон дурда, халыҥ хахха, тулхадыйбат тулааһын буола сырыт!
Итини сэргэ махтал-баһыыба тылларын Бүрээт өрөспүүбүлүкэтиттэн кэлэн үлэлээн барбыт, Иван Халбаев салайааччылаах десантниктар бөлөхтөрүгэр тиэрдэбит. Уолаттар ыксаллаах күммүтүгэр олус көмөлөһөн, абыраан бардылар.
Биллэн турар, кинилэри сэргэ биһиги биир саамай улахан махталбытын кытара кытыастар уоту утары охсуһууга кыттыбыт, күүс-көмө буолбут бар дьоммутугар аныыбыт.
Бары үтүөнү уонна махталы кытта Сүлдьүкээр нэһилиэгин баһылыга Иван Оюров.
Хаартыскалары олохтоох дьаһалта тиксэрдэ.
