АЛРОСА-ҕа хайдах үлэҕэ киириэххэ уонна бэйэ аналын булуохха сөбүй?
Хас биирдии идэ көрдөнө, толкуйдана сылдьар киһи санаата сытар. Бэйэтигэр сөптөөх, барсар идэни таба тайанан, үчүгэй исписэлиис буола үүнэн-сайдан, үчүгэй хамнастаах үлэҕэ тиксиэн ыралыыр. Оччотугар аныгы кэмҥэ туох идэни талыахха сөбүй? Холобур, үрдүк хамнастааҕынан, үчүгэй усулуобуйалааҕынан биһиэхэ АЛРОСА хампаанньа биллэр. Оттон онно ханнык идэлээхтэргэ ордук наадыйарылларый уонна бу аан дойду таһымыгар тиийэ биллибит алмаас тэрилтэтигэр үлэҕэ киирэргэ туох үөрүйэх, сатабыл ирдэнэрий? Бүгүн ол туһунан кэпсэтэргэ быһаардыбыт.
Муус устар 12 күнүгэр, Дьокуускайга, «Үлэ кыбартаала» креативнай кластерга, Бүтүн Арассыыйатааҕы «Работа России. Время возможностей» диэн Үлэ дьаарбаҥкатын эрэгийиэннээҕи түһүмэҕэ буолан ааста. Тэрээһин биир тутаах, көхтөөх кыттааччыта – үгүс үлэ миэстэтинэн тиһиктээхтик хааччыйар АЛРОСА хампаанньа.
Бу маннык Үлэ дьаарбаҥ-катын көмөлөрүнэн, үөрэх кыһаларын устудьуоннара баһылыахтаах идэлэрин, үлэлиэхтээх тэрилтэлэрин быһаараллар, оттон үлэ көрдөнөөччүлэр бастыҥ усулуобуйалаах диэбит тэрилтэлэригэр үлэ булуналлар.
АЛРОСА бу да тэрээһиҥҥэ бакаансыйа халыҥ испииһэгин бэлэмнээн аҕалбыт этэ. Ону сэргэ сонно тута баахта ньыматынан үлэлиэн баҕалаахтартан сайабылыанньалары хомуйбута. Олус наадалаах иһитиннэриини биэрэр буолан, исписэлиистэргэ сарсыардаттан уочарат үөскээбитэ. Үлэ миэстэтин тутаах хампаанньа эрэ буолбакка, ону тэҥэ салаа тэрилтэлэрэ: «Анаабыр алмаастара», алмааһы атыылыыр Дьокуускайдааҕы тэрилтэ, «Алмаздортранс», «АЛРОСА-спецбурение» уо.д.а. эмиэ таһаараллар.
Дьаарбаҥкаҕа кыттыы уонна хампаанньа каадыры кытта үлэтин туһунан биһиги АЛРОСА хампаанньа алмааһы атыылыыр Дьокуускайдааҕы тэрилтэтин салайааччыта Алексей Евстратовы кытта кэпсэтэ сырыттыбыт.
«Хампаанньаҕа наадалаах идэлэр испииһэктэрэ олус киэҥ. Тутааччылартан, геологтартан саҕалаан, АйТи эйгэтин уонна оҥорон таһаарыыны автоматизациялыыр исписэлиистэргэ тиийэ. Үгэс курдук, идэлээх үлэһиккэ ордук улахан наадыйыы Айхал, Удачнай уонна Мииринэй-Ньурба хайа байытар кэмбинээттэригэр, хапытаалынай тутуу управлениетыгар уонна Мииринэйдээҕи массыына суолларын управлениетыгар баар буолар”, – диир Алексей Евстратов.
Оробуочай да идэлэргэ наадыйыы куруук да баар буолар. Холобур, проходчиктары, оборудованиены уонна массыыналары көрөр-истэр, өрөмүөннүүр силиэсэрдэри, электриктэри, араас хабааннаах установкалар массыньыыстарын, суоппардары үөрүүнэн көрсөллөр. Ону тэҥэ инженер исписэлиистэргэ, ол иһигэр былаанныыр, конструктор-инженердэргэ, симиэтэ оҥорооччуларга.
Алексей Евстратов АЛРОСА олохтоох нэһилиэнньэни үлэҕэ ыларга ураты болҕомтону уурарын, интэриэстээҕин бэлиэтиир.
«Биһиги 2018 сылтан саҕалаан Дьарыктаах буолуу судаарыстыбаннай кэмитиэтин кытта ыкса үлэлэһэбит. Ааспыт кэм иһигэр АЛРОСА-ҕа уонна салаа тэрилтэлэригэр 16 тыһыынчаттан тахса Саха сирин олохтооҕо үлэ булунна. Кинилэртэн 3,5 тыһыынчата – ыччат, 2,7 тыһыынчата ¬ тыа сирин олохтооҕо. Үлэтэ суохтары, ол иһигэр тыа сирин олохтоохторун, үлэлээх, дьарыктаах оҥорууга тиһиктээх үлэ ыытыллар», – диир АЛРОСА ЯПТА дириэктэрэ.
Бу сыл саҕаланыаҕыттан тутаах хампаанньаҕа 500-тэн тахса өрөспүүбүлүкэ олохтооҕо, оттон “Анаабыр алмаастара” тэрилтэтигэр – тыһыынчаттан тахса биир дойдулаахпыт үлэҕэ киирбит. Уопсайа АЛРОСА бөлөҕүн тэрилтэлэригэр күн бүгүн 35 тыһ. тахса киһи үлэлиир. Бэйэ кыаҕын-таһымын уонна билиитин туһаҕа таһаарар баҕалаах дьоҥҥо хампаанньа аана өрүү аһаҕас.
Оҥорон таһаарыыга –оскуолаттан
Хампаанньа алмааска үлэлиэхтээх каадыры оскуола үөрэнээччитэ эрдэхтэриттэн бэлэмнээн таһаарарга дьулуһар. Ол курдук, үрдүкү кылаас үөрэнээччилэригэр тэхиниичэскэй уонна технологическай диссипилиинэлэри тэҥинэн алмааһы хостуур үлэ төрүттэрин үөрэтэр “АЛРОСА-кылаастара” ситиһиилээхтик үлэлииллэр.
Хампаанньа үлэтигэр, оҥорон таһаарыытыгар сыһыаннаах хайысхаларга үөрэтэр үөрэх кыһаларын кытта бииргэ үлэлэһиитэ сыллата кэҥиир, сайдар. Холобур, соторутааҕыта АЛРОСА хампаанньа М.К. Аммосов аатынан Хотугулуу-Илиҥҥи федеральнай университеты кытта саҥардыллыбыт бииргэ үлэлэһии Сөбүлэҥин түһэрсибитэ. Манна бэлиэтээн этэххэ, ХИФУ алмаас салаатыгар каадыры бэлэмнээн биэрэр кылаабынай үөрэх кыһаларыттан биирдэстэрэ буолар. Саҥа Сөбүлэҥҥэ үөрэнээччилэр идэни талалларыгар (профориентация) көмөлөһөр үлэ кэҥээн биэрбит. “Үөрэнэбин уонна үлэлиибин” бырайыак чэрчитинэн, үрдүкү куурус устудьуоннара үөрэнии тус (индивидуальнай) бырагырааматыгар көһөн баран, идэлэригэр дьүөрэ идэнэн хампаанньаҕа үлэлээбитинэн барар кыахтаахтар. Кэнники сылларга университет кэнниттэн АЛРОСА тэрилтэлэригэр үлэҕэ киирбит 100-тэн тахса исписэлиис баар. Хас сыл аайа хампаанньаҕа университет 150-тан тахса устудьуона производственнай быраактыкатын барар. Баһылаары сылдьар идэтигэр сыаната биллибэт сүҥкэн уопуту ылар, ылбыт билиитин дьиҥ үлэнэн хаҥатар. Ол курдук, устудьуоннар университеттан алмаас үлэтигэр бэлэмнээх буолан тахсаллар.
Алексей Евстратов кэпсээбитинэн, ХБК-ларга, батарар комплекска уонна да хампаанньа бары хааччыйар салаа тэрилтэлэригэр анаан, исписэлиистэри сыллата бэлэмнииллэр.
«АЛРОСА алмааһы атыылыыр Дьокуускайдааҕы тэрилтэтигэр минералогтар уонна геммологтар күндү тааһы суортарга араарар уонна сыаналыыр кыахтаах үрдүк таһымнаах исписэлиистэр наада буолаллар. ХИФУ-ну уонна Дьокуускайдааҕы бырамыысыланнай техникуму кытта бииргэ үлэлэспиппит быданнаата. Бу үөрэх кыһатын устудьуоннара сыллата биһиэхэ производственнай быраактыкаларын бараллар. Холобур, бу үөрэх дьылыгар 4 устудьуон быраактыкалана сылдьар. Оттон былырыын ЯПТА-ҕа ити үөрэх кыһаларыттан 5 саҥа үлэһит кэлбитэ», – диир Алексей Евстратов.
АЛРОСА талааннаах ыччаты сэҥээрдэр интэриэһэ улахан
АЛРОСА үлэ миэстэтин дьаарбаҥкатыгар булгуччу хайаан да кыттар үгэстээх. Ону тэҥэ М.К. Аммосов аатынан ХИФУ, Дьокуускайдааҕы бырамыысыланнай техникум курдук уо.д.а. каадыры бэлэмнээн таһаарар үөрэх кыһаларын устудьуоннара кинилэргэ быраактыкаланаллар табыгастаах усулуобуйаларын бэлэмнээн биэрэр. Бу маннык ыкса үлэлэһии көдьүүһэ харахха быраҕыллар. Ону таһынан Үлэ дьаарбаҥкатын эбэтэр хампаанньа Аһаҕас ааннарын кэмигэр баҕалаах устудьуоннар бэйэлэринэн кэлэн, кэпсэтэн, быраактыкаланар холобурдара эмиэ баар. АЛРОСА исписэлиистэрэ бииргэ үлэлэһэр үөрэх тэрилтэлэригэр анаан-минээн тиийэн, лиэксийэ ааҕаллар, оҕолордуун көрсүһүүлэри тэрийэллэр. Ити курдук устудьуоннары кытта сирэй көрсөн, кэпсэн, бастыҥ үөрэҕи бүтэрээччилэри бэйэлэригэр тардар, интэриэстиир өттүгэр күүскэ үлэлииллэр.
АЛРОСА хампаанньа үчүгэй үөрэхтээх, ситиһиилэрдээх устудьуоннардыын кинилэргэ истипиэндьийэни аныыр туһунан дуогабардары эмиэ түһэрсэр. Итинник истипиэндьийэни үһүс уонна онтон үөһээ кууруска үөрэнэр, орто бааллара 4 баалтан кырата суох устудьуоннар собеседованиены аастахтарына ылар кыахтаахтар. Онуоха эбии билимҥэ арыйыылаах, ситиһиилээх, туох эрэ сонуну айбыт биитэр араас кэмпириэнсийэлэргэ кыттыбытын кэрэһилии сэртипикээттээх буоллаххына, истипиэндьийэлэнэр кыах биллэ улаатан биэрэр. Маннык истипиэндьийэ анаммыт устудьуона хаһан үөрэнэн бүтэриэр диэри онтун ылар. Ону ааһан хампаанньа устудьуон быраактыкаланар сиригэр кэлэр-барар айанын төлөбүрүн уйунар, өссө прозводственнай быраактыканы барарыгар харчы төлүүр. Дьэ, оттон үлэҕэ дьулуурун, үлэһитин, тыыппалааҕын көрдөрдөҕүнэ үөрэҕин кэнниттэн үлэнэн хааччыллыбыт да курдук сананыан сөп.
Хампаанньаҕа үлэлиэҥ – көмүскэллээх буолуоҥ!
АЛРОСА эдэр исписэлиистэри бары өттүттэн өйүүргэ дьулуһар: карьераларын, идэҕэ таһымнарын үрдэтэллэригэр эрэ буолбакка, күннээҕи олохторун-дьаһахтарын, олорор усулуобуйаларын оҥостоллоругар тиийэ араас суол чэпчэтиилэри көрөр. Холобур, корпоративнай уопсай дьиэлэргэ миэстэ биэрэр, олорор дьиэни уларсар төлөбүрдэрин уонна ипэтиэкэ ылбыттарга, ол бырыһыанын кэмпэнсээссийэлиир. Саҥа үлэҕэ кэлээччи кэлэктииби кытта уопсай тылы кэбэҕэстик буларын, үлэ үөрүйэхтэрин быһалыырын туһугар киниэхэ настаабынньык сыһыарыллар.
Үлэһиттэр идэҕэ таһымнарын уонна лиидэрдии үөрүйэхтэрин уонна кэмпитиэнсийэлэрин сайыннарыыга АЛРОСА Корпоративнай университета эппиэттиир университет бартыбыалыгар 500-тэн тахса араас үөрэх кыһата киирэр, ол иһигэр оробуочай идэлэргэ профессиональнай бэлэмнээһин, эбии идэлэргэр үөрэтии киирэр. Ис тириэньэрдээһин тиһигэ көхтөөхтүк үлэлиир.
Хампаанньа биир чааһа, өлүүскэтэ буоларга араас уопсастыбаннай, култуурунай уонна успуорт тэрээһиннэригэр кыттыы көмөлөһөр. Аҥаардас успуорт сиэксийэтин этэр буоллахха, успуорт 26 көрүҥэр 200-чэ араас сиэксийэлэрэ үлэлииллэр. Успуорт саалалара бааллар, ол иһигэр баахта бөһүөлэктэригэр эмиэ. Итинник инфраструктура хампаанньа салаа тэрилтэлэрин үлэһиттэрин ортотугар бастайааннай өрүккэ араас күрэхтэһии ыытарыгар көмөлөөх. Күрэххэ кыайа-хоту ордук ыччат сөбүлээн кыттар.
Ити курдук, кэмпитиэнсийэлэргэ бастыҥнары быһаарыы эмиэ куонкурус быһыытынан барар.Итинэн алмаас хампаанньата үлэһиттэрин ис кыаҕын, талаанын таба тайанан арыйарга, сайыннарарга үлэлэһэр, үрдүк кылаастаах салайар каадыр эрэсиэрбэтин оҥостор кыахтанар. Онон кэллиэгэлэри кытта күрэхтэһии идэлээх (профессионал) быһыытынан эрэ сайдаргар көмөлөспөт, үлэһит сайдар саҕаҕын арыйар, карьера өрө көтөн тахсарыгар ыстанар үктэл тэҥэ буолар эбит.
Түмүктээх эттэххэ, АЛРОСА бэрт киэҥ хабааннаах, араас эгэлгэ идэлээхтэргэ, үлэһиттэргэ наадыйар. Алмаас хостуур хампаанньаҕа ханнык идэлээхтэргэ аһаҕас миэстэ (бакаансыйа) баарын HeadHunter, Rabota YKT уо.д.а. саайтарга, араас социальнай ситимнэргэ уонна хампаанньа мессенджердэригэр да киирэн, холкутук билэр, билсэр кыахтааххыт.
АЛРОСА хампаанньаҕа үлэлиэн баҕалаахтар, 8 800 585 5885 төл. нүөмэригэр эрийэн ыйыталаһыҥ. Эбэтэр резюмеҕытын Этот адрес электронной почты защищён от спам-ботов. У вас должен быть включен JavaScript для просмотра. аадырыска ыытар кыахтааххыт.
VK «Работа в АЛРОСА» сирэйигэр киирэн, субу кэмҥэ ханнык үлэ миэстэлэрэ баалларын билсиҥ: https://vk.com/jobalrosa
Telegram бот – АЛРОСА: @Corp_University_Bot
Оттон резюмены ыытарга эбэтэр үлэ көрдөнөөччү быһыытынан регистрацияланаргытыгар чат-боту эбэтэр колл-центр эпэрээтэрин көмөтүн туһанар кыахтааххыт.
Иһитиннэриини Этот адрес электронной почты защищён от спам-ботов. У вас должен быть включен JavaScript для просмотра. элэктириэн почтаҕа суруйан, эмиэ билэр кыахтааххыт.
Андрей ШИЛОВ суруйуутуттан ЛОҺУУРА.
