Ааспыт нэдиэлэҕэ Саха сирин Үрдүкү суута Мэҥэ Хаҥаластааҕы оройуоннай суут Чурапчы улууһун баһылыгын Андрей Ноговицыны дуоһунаһыттан босхолуур туһунан таһаарбыт бириигэбэрин оннунан хаалларбыт. Инньэ гынан, билигин кини баһылыктаан бүттэ.
Билигин Чурапчы улууһун баһылыгын эбээһинэһин улуус баһылыгын бастакы солбуйааччыта Алексей Ноговицын толорор. Андрей Ноговицын албакааттара Үрдүкү суут бириигэбэригэр кассационнай модьуйууну түһэрэргэ үлэлииллэрин этэллэр.
Мэҥэ Хаҥаластааҕы суут Андрей Ноговицын боломуочуйалаах сулууспатын туһанан харчыны ыскайдаабытыгар уорбалаан тохтоппута. Андрей Ноговицыҥҥа холуобунай дьыаланы 2019 сыллаахха кулун тутарга көбүппүттэрэ. Силиэстийэ сабаҕалыырынан, улуус баһылыга Чурапчытааҕы үөрэтэр-производственнай кэмбинээт дириэктэригэр муниципальнай бүддьүөттэн бэйэтин дьиэтин тэлгэһэтин туттарарга диэн 140 тыһ. солк. суумаҕа тутуу матырыйаалын ыларга сорудахтаабыт.
2019 с. Мэҥэ Хаҥаластааҕы суут Ноговицыны буруйа суоҕунан аахпыта. Ону кытары борокуратуура сөпсөпөтөҕө: былырыын олунньуга ааһыммыта, Үрдүкү суут кэллиэгийэтэ дьыаланы саҥа көрүүгэ ыыппыта. Онуоха оройуоннааҕы суут сорох туоһулар көрүүлэрин болҕомтоҕо ылбатаҕын, чуолаан дьаһалта үлэһитэ Ноев счет реквизиттэрин салалта дьаһалынан уларыппытын, "СГ-Строй" маҕыһыын ыскылаатын сэбиэдиссэйэ биэрбит көрдөрүүтүн, баһылык ити 140 тыһ. солк. хоромньутун төлөөбүтүн болҕомтоҕо уурбатаҕын эппитэ.
