Ахсынньы 3 күнүгэр Атласовтар этно уһаайбаларыгар өрөспүүбүлүкэтээҕи муус скульптураларын оҥоруу куонкуруһа түмүктэннэ.
Куонкуруска Саха сирин биллэр муус искусствотын маастардара кыттыыны ыллылар. Кинилэр истэригэр биһиги биир дойдулаахпыт Модут нэһилиэгин олохтооҕо Василий Аргунов баар.
Василий Артемьевич “Духовный мир Арктики” (“Хотугу уһук булуус өйө-санаата”) диэн дириҥ ис хоһоонноох, бэйэтэ туспа ураты сюжеттаах уран скульптураны чочуйан таһаарда. Конкурс ис хоһоонунан саамай элбэх болҕомтону тардыбыт, куолаһы, сэҥээриини ылбыт оҥоһук кыайыылааҕынан ааттаныахтааҕа. Онуоха куоластааһын түмүгүнэн Василий Аргунов үлэтэ кыайыылааҕынан таҕыста. Бу туһунан @etno_usadba суруйда.
Василий Артемьевич конкурс муҥутуур кыайыылааҕынан ааттанна уонна 150 тыһыынча солкуобай харчынан наҕараадаланна. Удьуор уус дьиэ кэргэн аҕа баһылыгын уочараттаах улахан ситиһиитинэн эҕэрдэлиибит, чахчы даҕаны республикаҕа бастыҥ, ураты буочардаах маастар-скульптор буоларын өссө төгүл дакаастаата.
"Око хранителя"
Куонкуруска маастар уола Василий Аргунов “Око хранителя”, биир дойдулаахпыт Григорий Максимов “Дочь Арктики” диэн скульптураларынан кытыннылар уонна махтал суругунан, спонсордар @kamelek888, @profi_market сыаналаах бириистэринэн бэлиэтэннилэр.
"Дочь Арктики"
Ылыллыбыт сигэтэ: Нам улууһун саайта - https://xn--h1aaigu4ed.xn--p1ai/article/33584
