Муус устар 27 күнүгэр бэлиэтэнэр Өрөспүүбүлүкэ күнүн уонна Ыһыаҕы (бэс ыйын 21 күнэ) өрөбүл күн оҥоруохтарын баҕараллар. Итинник ис хоһоонноох сокуон бырайыагын СӨ Профсойуустарын федерацията Ил Түмэҥҥэ киллэрбит.
Профсойуус федерациятыгар үлэ быраабын иниспиэксийэтин салайааччы Наталья Барковская этэринэн, дьиҥэр, СӨ Төрүт сокуона ылыллыаҕыттан ити күннэри өрөбүл диэн биллэрбиттэр эбит эрээри, сокуоҥҥа мэктиэлэммэккэ хаалбыт. Профсойуустар ол иһин ити сокуону көҕүлээн киллэрбиттэр.
Даҕатан эттэххэ, сокуон олоххо киирдэҕинэ, бырааһынньык күн үлэлиир дьон үрдэтиллибит хамнаһы аахсыахтара, бырааһынньык иннинээҕи күн аҕыйах чааһынан кылгас буолуо, оттон бырааһынньык күнэ өрөбүлгэ түбэстэҕинэ, бырабыыталыстыба уурааҕынан көһөн биэриэ.
