Иран үрдүкү баһылыга Аятолла Хаменеи сэтинньи бастакы күнүгэр “Билиҥҥи сэрии Газа уонна Израиль сэриилэрэ буолбатах, бу кырдьык уонна сымыйа сэриитэ, бу империализм уонна итэҕэл сэриитэ” диэн аан дойду цивилизацияларын сэриилэрэ чугаһаабытын курдук эппит.
Чахчы буолуо дуо? Араап, Ислам дойдуларыгар Гага арааптарын көмүскэһэн уулусссаҕа дьонноро ыстаҥалаһыы бөҕө. Кырдьыгынан эттэххэ, бу “дьоруойдар” саа тутуутугар тиийдэххэ, мөлтүүһүктэр быһыылаах.
Баай Араап эмираттара Израилы кытта сыһыаннарын быһыахтарын баҕарбаттар. Парламеннарын үрдүк сололоох тойоно Газа туһуттан Израилы кытта сыһыаммытын буортулуохпутун баҕарбаппыт диэбит.
Израильга сэриини биллэрбит Йемен Израилы ытыалаабыт ракеталарын барыларын Эмиэрикэ Израилы көмүскээри Иорданияҕа туруорбут “Пэтриот” систиэмэтин ракеталарынан утары ытан суулларбыт. Иордания мусульманнар дойдулара, Газа арааптарын кыдыйыыттан уордайбыт норуот дьэбириэйдэри кэһэтиэхпит диэн эккирээһин бөҕө этэ, былаастара Газаны күн аайы көмүскэһэр. Ол бэйэлэрэ, Эмиэрикэҕэ бэрт буолан, “Пэтриоттары” Иорданияҕа туруоралларын көҥүллээбит. Икки сирэй буолуу буолбатах дуо?
Саудовскай Аравия эмиэ Эмиэрикэ Израилы көмүскүүргэ ракеталарын бэйэтин сиригэр туруорарын көҥүллээбит. Саудиттар эмиэ миитиннээн, Газаны көмүскээн айахтара кытаран олороро дииргэ тиийиллэр.
Газа 2,3 мөл. нэһилиэнньэтэ Израиль уотун ортотугар олорбуттара ый буолан эрэр. Уонча тыһыынча киһи, оҕо дьахтар, кырдьаҕас өллө. Оттон кыраныыссалаһа сытар Египет бу дьону быыһаан бэйэтигэр киллэриэн баҕарбат, кыраныыссатын саба сытар. Египет дьоно эмиэ Газаны көмүскээн ыһыы-хаһыы, ыстаҥалааһын бөҕө этилэр.
Израиль мусульманнар дойдуларыгар Азербайджаннаах Турцияҕа тааҥкаларын уматыгын биэрэллэрин иһин бокулуоннуу-бокулуоннуу махтанар. Оттон балар эмиэ Газаны көмүскээн, миитин бөҕө этилэр. Эрдоган итэҕэлин көмүскээн тугу да гыммата, салгыны эрэ сатарытта.
Онон араас санаа киирэр. Күн бэҕэһээ Израилы кэһэтиэх, Газаны көмүскээн үһүс аан дойдуну тэрийиэхтэрин сөп диир арааптарбыт да, ислам дойдулара да, тугу да гыммакка таах олоруохтарын сөп.
Ол да иһин буолуо, хас да сэриигэ арааптары хайдах ныһыйарга үөрэммит Израиль туохтан да толлубакка, Газа сирин бэйэтигэр ылаары, Палестина арааптарын суох гынар былаанын эһэ хаамыытынан толорон иһэр.
Бэйэ кэр.
