Биэнсийэ индексацияланар, дьон олорор дьиэтигэр үлэлиир “наливайкалар” бобуллаллар, Аҕа дойду сэриитин пааматынньыктарын өрөмүөннүүр судургу буолар. Итинтэн атын өссө туох уларыйыы киирбитин туһунан Госдума саайта суруйбутун тылбаастаабыппытын ааҕыҥ.
Биэнсийэ индексацията. Бу күнтэн саҕалаан социальнай биэнсийэ (иитимьилэрин сүтэрбиттэргэ, инбэлииттэргэ уонна кырдьыбыттарынан биэнсийэҥэ тахсыбыттарга) 7,5 бырыһыанынан үрдүүр. Санаттахха, бу сыл тохсунньутугар эмиэ итиччэ бырыһыанынан страховой биэнсийэ үрдээбитэ.
“Наливайкалар” хааччахтаналлар. Мантан антах элбэх кыбартыыралаах дьиэлэргэ баар уопсастыбаннай аһылык туочукаларыгар итирдэр утах атыыланар бириэмэтин, ону таһынан эрэстэрээннэргэ, бардарга, кафеларга, буфеттарга пиибэ, сидр уонна атын итирдэр утах атыыланар ирдэбилин эрэгийиэн бэйэтэ олохтуур-хааччахтыыр кыахтанар.
Суоппар бырааба. Суоппар буоларга холонор дьон үс төгүл эксээмэннээн баран сатаан туттарбатахтарына, төрдүс уонна онтон кэлэр сырыыларын оруобуна сыл аҥаара буолан эрэ баран туттарар кыахтаналлар.
Хотугу таһаҕас. Уһук Хоту уонна онно тэҥнэммит территориялары тыын суолталаах табаарынан хааччыйарга туһуламмыт “Хотугу таһаҕаһы тиэйии туһунан” тирэх сокуон күүһүгэр киирэр. Хотугу эргимтэҕэ тиэллэр таһаҕас үс көрүҥнээх буолар. “Бастакы” уонна “иккис” көрүҥнэргэ эмт-томп, ас-үөл, уматык, о.д.а. киирэллэр.
Авиа-хампаанньалар ыстарааптара. Авиа-хампаанньалар дьону, малы-салы (багаж) уонна таһаҕаһы (груз) тиэйиини-таһыыны хойутаттахтарына, хас биирдии хойутаппыт чаастарын иһин сүүстүү солкуобай ыстараап төлүөхтэрэ. Хампаанньалар ыстараап төлүүртэн арай кинилэртэн тутулуга суох төрүөтүнэн хойутаттахтарына төлөөмүөхтэрин сөп.
Пааматынньыктар. Муниципалитеттар Аҕа дойду Улуу сэриитин кыттыылаахтарыгар, сиэртибэлэригэр анаммыт уонна кинилэр сырдык ааттарын үйэтитэр ис хоһоонноох пааматынньыктарын судургутутуллубут бэрээдэгинэн түргэнник өрөмүөннүүр буолуохтара. Тоҕо диэтэххэ, Арассыыйаҕа Аҕа дойду Улуу сэриитигэр анаммыт пааматынньыктар туспа реестрдэрэ оҥоһуллуо.
