Дьоппуоннар былдьаһар 4 Соҕуруу Курил арыылара Олимпиада уотун маршрутун картатыгар Япония сирин курдук киллэриллибит.
Ол курдук, Кунашир, Шикотан, Итуруп уонна Хабомаи арыылар Хоккайдо перефектуратын сиригэр “сыбаммыттар”. Бу Арассыыйа арыыларын 2020 сылга буолар Олимпиада Оонньууларын саайтыгар киирэн баттаатахха, Хоккайдо сирэйигэр түбэһэҕин.
Санатар буоллахха, Япония Кунашир, Шикотан, Итуруп, Хабомаи арыылары 1855 сыллааҕы икки өрүттээх эргиэн уонна кыраныысса Трактатыгар олоҕуран былдьаһар. 1956 сыллаахха ССРС уонна Япония икки өрүттээх декларацияны баттаспыттара. Онно Москуба Хабомаи уонна Шикотан арыылары эйэ дуогабарын баттастахха төнүннэриэн сөбүн туһунан сөбүлэспиттэрэ, онно Кунашир уонна Итуруп дьылҕалара киллэриллибэтэхтэрэ. Иккис аан дойду сэриитин да кэннэ, ССРС Японияны кытары эйэ дуогабарын баттаспатаҕа. Оттон ССРС "Соҕуруу Курил арыылара Иккис аан дойду сэриитин кэннэ биһиэхэ киирбиттэрэ уонна суверинитетынан бигэргэммитэ" диэн кытаанах санаалаах.
2018 сыл сэтинньи 14 күнүгэр Сингапурга Владимир Путин уонна Синдзо Абэ көрсүбүттэрэ. Ол кэннэ Япония премьер-миниистирэ 1956 сыллааҕы декларацияҕа олоҕуран эйэ дуогабарын баттаһыы процеһа түргэтээбитин эппитэ.
Таарыйа эттэххэ, Токиоҕа ыытыллар Олимпийскай Оонньуулар эһиил от ыйын 24 кһнһттэн атырдьах ыйын 9 күнүгэр дылы буолуохтара, оттон Паралимпиада атырдьах ыйын 25-балаҕан ыйын 6 күннэригэр ыытыллыахтара.
