Юрий Трутнев Ил Дархан Уһук Илин социальнай сайдыытын былааныгар Саха сиригэр кардиология уонна онкология диспансердарын тутууну туруорсубутун өйөөтө.
Кулун тутар 16 күнүгэр Дьокуускайга буолбут сүбэ мунньахха бу туһунан Егор Борисов РФ Бырабыыталыстыбатын бэрэссэдээтэлин солбуйааччы - Арассыыйа Бэрэсидьиэнин Уһук Илин федеральнай уокуругар боломуочуйалаах бэрэстэбиитэлигэр Юрий Трутневка эттэ.
“Кэлиҥҥи кэмҥэ Саха сиригэр ордук сүрэх-тымыр, маны таһынан, кутталлаах искэн ыарыыларыттан дьон өлүүтэ үксээтэ” – диэн Ил Дархан бэлиэтээтэ.
Кырдьык, ыстатыыстыканы ылан көрдөххө, өрөспүүбүлүкэҕэ хаан эргиирин ыарыытыттан үлэһит дьон ортотугар өлүү ахсаана билигин да үрдүк. 100 тыһ. нэһилиэнньэҕэ 165,4 ыарыһах тиксэр. Ааспыт 2017 сыл түмүгүнэн өрөспүүбүлүкэ үрдүнэн 2499 киһиэхэ кутталлаах искэн ыарыыта баара бэлиэтэммит. Онкология ыарыытыттан өлүү номнуо иккис миэстэҕэ таҕыста уонна салгыы инники күөҥҥэ тахсар кутталлаах.
Саха сиригэр бырамыысалыннас күүскэ сайдарын быһыытынан, бу эбийиэктэри тутуу ордук суолталаах. Санатар буоллахха, Бэрэсидьиэн онкология ыарыытын утары анал уопсай барылы олоххо киллэрэргэ, онкология кииннэрин саҥардарга, аныгы хайысханан көдьүүстээхтик эмтииргэ этии киллэрбитэ.
Бүгүҥҥү күҥҥэ өрөспүүбүлүкэҕэ онкология уонна кардиология ыарыылара сытыытык турар уонна салгыы дириҥиир кутталлаах. Ол иһин уһаппакка эрэ бу боппуруостары быһаарар уолдьаспыт. Егор Борисов бу эбийиэктэри туттарарга федеральнай бүддьүөттэн харчы көрөллөрүгэр этии киллэрдэ. Маныаха, “эрэгийиэннэҕи бүддьүөт эбии харчы көрүөҕэ” диэн Ил Дархан бэлиэтээтэ.
Юрий Трутнев Ил Дархан этиитин өйөөтө уонна Уһук Илиҥҥи сайдыы Министиэристибэтин салалтатыгар СӨ кытта бу боппуруоска Сөбүлэҥ түһэрсэргэ сорудахтаата.
Юрий Трутнев Уһук Илин социальнай сайдыытын Былааныгар Саха сиригэр 1,7 млрд.солкуобай суумалаах 7 социальнай эбийиэги киллэрэри анал хамыыһыйа бигэргэппитин эттэ. Вице-премьер маны таһынан Дьокуускай куорат 35 №-дээх оскуолатын, Нерюнгрига оҕо поликлиникатын өрөмүөнүн, ДьУОХХ тутууларын саҥардарга, Хандыгаҕа улуустааҕы гимназия саҥа дьиэтин тутарга, Орто Халымаҕа спорт сааланы, итиэннэ орто анал үөрэх кыһаларын материальнай-тэхэниичэскэй баазатын саҥарылларын эттэ.
Санатар буоллахха, сүбэ мунньахха СӨ Ил Дархана Егор Борисов, Ил Түмэн бэрэссэдээтэлэ Александр Жирков, СӨ Бырабыыталыстыбатын бэрэссэдээтэлэ Евгений Чекин, Госдуума дьокутаата Галина Данчикова, РФ Уһук Илин сайдыытын миниистирин солбуйааччы Сергей Качаев уо.д.а. кыттыыны ыллылар.
