Биллиилээх life.ru саайт сонуннарыгар суруллубутунан, Америка Холбоһуктаах Штаттара Арассыыйа утары саҥа үп-харчы рестрикциятын биллэрдилэр.
Бу ылан эттэххэ, Америка былаастара Арассыыйа бааннарын утары хааччахтаах миэрэлэри ыла сатаабыттара ырааппыт эбит. Бу күннэргэ үөдүйбүт хааччахтарыгар Сбербанк, ВТБ, "Газпромбанк", "Открытие", "Совкомбанк", "Альфа-банк" уонна Москубатааҕы кредитнэй баан түбэстилэр. Даҕатан этэр буоллахха, бу бааннарга сыһыаннаах миэрэлэр бэйэ-бэйэлэриттэн арыый уратылаһаллар эбит.
Биллэн турар, Арассыыйа Киин баана уонна дойдубут бырабыыталыстыбата бааннарга өйөбүлүн биллэрдэр, оттон бааннар бэйэлэрэ килийиэннэрин уоскутан, тохтообокко эрэ үлэлиэхпит диэн бигэргэтэн эттилэр.
Арассыыйа сиригэр-уотугар баан үлэтинэн туһанааччылар буоларын курдук өҥөлөрү ыла туруохтара. Маныаха, валютаҕа эпэрээссийэ оҥорооһуна уонна валюта конверсията эрдэтээҥҥитин курдук оҥоһуллуохтара. Бу аата, наличнай харчыны ханнык баҕарар валютанан ылыахха сөп. Маны таһынан, баан салаалара, банкоматтар, мэбиилинэй уонна интэриниэт бааннар үлэлэрин эмиэ тохтоппоттор.
Бары баан каарталара, ол быыһыгар тас дойдулары кытта төлөһөр систиэмэлээх Visa уонна Mastercard каарталара Арассыыйа иһигэр үлэлиэхтэрэ.
Ол эрээри, Киин Баан сэрэтэринэн, Apple Pay уонна Google Pay диэн баан сиэрбиһин сыһыарыыларын үлэтигэр хааччахтар киириэхтэрин сөп. Бу маннык уларыйыылар ВТБ, "Совкомбанк", "Открытие" баан, "Новикомбанк" уонна Промсвязьбанк каарталарын хаарыйыахтарын сөп.
Билиҥҥи туругунан, ордук күүстээх хааччахтааһын ВТБ, "Открытие", "Совкомбанк", "Новикомбанк" уонна Промсвязьбанк (ПСБ) бааннары таарыйда. Бу балар блоктанар санкцияларга түбэстилэр, ол эбэтэр, бу бааннар килийиэннэрэ кыраныысса таһын кытта сибээстээх харчы ыытыытын эпэрээссийэтин оҥороллоро, каарталары Арассыыйа кыраныыссатын таһыгар туттуулара, субу манан атын дойдулар интэриниэт-маҕаһыыннарыттан ону-маны атыылаһан төлүүллэрэ бу 30 күн иһигэр тохтуохтаах.
Оттон Арассыыйа атын бааннарыгар сымнаҕас соҕус санкциялар биллэриллибиттэр эбит. Ол курдук, Сбербанк эбэтэр "Альфа-банк" каарталарынан тас додуга сылдьан этэҥҥэ төлөһүөххэ сөп. Сбербаан утары АХШ арыый атын боротокуола киллэриллибит, ол эбэтэр, килийиэннэр улахан көҥүлэ суох бааҥҥа корсчет арыныа уонна өҥөтүн туһаныа суохтаахтар. Оттон "Альфа-банк" сүрүн хааччаҕа – хапытаал ырыынагар саҥа иэс ылыы өҥөтүн оҥоруу. Маннык курдук миэрэ МКБ-р көрүллүбүт, бу харчы эргинэр тэрилтэҕэ тас ырыынакка дуоллар хапытаалыгар сыһыаннаах дьайыылары оҥоруу бобуллубут.
Матырыйаал ife.ru саайтан ылылынна
