Аан дойду, Европа сүүрүүгэ хас да төгүллээх чемпионката, Россия спордун маастара Варвара Макарова - Сүүрүк Балбаара 80 сааһын туолар өрөгөйдөөх үбүлүөйүн көрсө Дьокуускай куоракка бэтэрээннэр ортолоругар "Сүүрүү үөрүүлээх күнэ" кросс-сүүрүү күрэҕин ыытта.
Тэрээһин үөрүүлээх аһыллыытыгар СӨ физическэй культураҕа уонна спордун миниистирин 1-кы солбуйааччыта Александр Бугаев Варвара Григорьевнаҕа "Маассабай спорду уонна чөл олоҕу тарҕатыыга үтүөлэрин иһин" уонна ГТО кыһыл көмүс мэтээлин үөрүүлээх быһыыга-майгыга туттарда. Кини Сүүрүк Балбаара чөл олох пропагандиһа, өрөспүүбүлүкэҕэ спорт сайдыытыгар сүҥкэн үтүөтүн-өҥөтүн, туйах хатарааччы, кыахтаах сүүрүк Полина Усмановна диэн кыыстааҕын сөҕөн-махтайан кэпсээтэ уонна Варвара Григорьевна үбүлүөйүн атын дьон курдук аймахтарын ортотугар көннөрү рестораҥҥа эрэ бэлиэтээн кэбиспэтэҕин, чөл олоҕу, спорду тарҕатан, өрө тутан маннык күрэҕи ыытарын хайдахтаах курдук сөҕөрүн, холобур оҥосторун киэн тутта иһитиннэрдэ.
Маны таһынан, "Сунтаар улууһа" МТ баһылыга Анатолий Григорьев "Үлэҕэ килбиэнин иһин" уонна "Бочуоттаах бэтэрээн" бэлиэлэри туттарда, Сүүрүк Балбаара эдэрдии эрчимин, кыаҕын, туруоруммут сыалын-соругун ситиһэрин бэлиэтээн эттэ. Сүүрүк эр дьон 5 км., дьахталлар 2,5 км. сүүрэн, араас саастарынан күрэхтэһэн, мэтээллэринэн, харчынан наҕараадаланнылар, бириистээх миэстэҕэ тиксибэтэх да спортсмен илии тутуурдаах, өттүк харалаах, Варвара Григорьевнаттан анал бириистээх дьиэлээтэ. Мустубут дьон Сүүрүк Балбаара олоҕун сэһэнин, хайдахтаах булчутун, кусчутун, элбэх дьон сырдык тыынын быыһаабыт талааннаах эмчитин таһынан, үҥкүүлээн тэйэ сылдьар, куруук үөрүү-көтүү аргыстаах, үгүс атастаах-доҕордоох, эрэллээх аймах-билэ дьонноох-сэргэлээх диэн астына, сэмээр үөрэн тарҕаспыттарыгар киһи саарбахтаабат.
Варвара Григорьевна алаадьылара минньигэстэр уонна сылаастар, аны бырааһынньыгы иилээн-саҕалаан ыытар бэйэтин аймахтарын, төрөппүт кыргыттарын Ульяналаах Полинаны этэ да барыллыбат, холкулара, үөрүнньэҥнэрэ, үүт-үкчү ийэлэрин курдуктар.
Саас сааһынан суруйдахха, сааскы күммүт сарсыардаттан чаөылыччы тыган, тыалбыт хаптайан, уоскуйан сүүрүктэргэ анаммыт кун буолбута дууһа үөрүүтүн толору биэрэн, анаан-минээн сүүрүү бырааһынньыгар өрөспүүбүлүкэ араас муннугуттан быстыбат уһун тыыннаахтарын, быһый атахтаахтарын "Туймаада" стадиоҥҥа түмтэ.
Саастарынан араарыллар регистрация аастыбыт, дуоһуйа сүүрүҥ диэн усунуос ылбатылар. Аны дистанцияларгын түмүктээккин кытары, Варвара Григорьевна хаартыскалаах кыһыл кеөмүс мэтээллэр дьоһуннаахтык моойбутугар кэтэрдиллэн истилэр. Өрөспүүбүлүкэ уһун тыыннаахтарын, күүстээх куоластаах ырыаһыттарын, тойуксуттарын кытта биир дойдулаахпыт Р. Н. Крылова спортсмен ырыаһыттарбытыгар барыларыгар баянынан доҕуһуоллуу, музыкатынан киэргэтэн истэ. Бииртэн биир ис сүрэхтэн эҕэрдэ тыллар, Варвара Григорьевнаны 100 сааһынан муҥурдамматыгар баҕа санаалар этилиннилэр.
