СӨ уус-уран гимнастикаҕа федерациятын бэрэсидьиэнэ Людмила Николаева Арассыыйа уус-уран гимнастикаҕа федерациятын кытта кэпсэтиитин түмүгэр, Саха сирин сүүмэрдэммит хамаандата Москуба Новогорскайын олимпийскай бэлэмнэнии киинин базатыгар дьарыктаныаҕа.
Кыргыттары эһиилги" Азия оҕолоро" аан дойдутааҕы оонньууга олимпийскай чөмпүйүөн, Арассыыйа сүүмэрдэммит хамаандатын ыстаарсай тириэньэрэ Ксения Дудкина бэлэмниэҕэ. Бу туһунан кэпсэтии кини кулун тутарга «Муус устар-2023» бэстибээлгэ кэлэ сырыттаҕына буолбута. Соторутааҕыта Ксения Дудкина Дьокуускайга кэлэ сылдьан гимнастикаҕа дьарыктыыр кулууптартан, успуорт оскуолалартан гимнасткалары сүүмэрдээн барда. Онон, биһиги оҕолорбут Новогорскайга дойду олимпийскай сүүмэрдэммит хамаандатын кытта тэҥҥэ, биир саалаҕа эрчиллиэхтэрэ.
Людмила Николаева этэринэн, оҕолор үрдүкү олимпийскай маастарыстыба, дойду саамай бастыҥ гимнасткалара дьарыктанар, аан дойду уһулуччу уһуйааччылара үлэлиир эйгэлэригэр алтыһан, дьаныардаахтык, күүрүүлээхтик эрчиллэн, элбэх билиини ылыахтара, успуорт сатабылын иҥэриниэхтэрэ. Кини: «Олимпийскай бэлэмнэнии киинин кытта сөбүлэһии биһиги хамаандабытыгар улахан эппиэтинэһи сүктэрэр. Маннык кыах көстүбүтүгэр Ксения Дудкинаҕа, Арассыыйа уус-уран гимнастикаҕа федерациятын бэрэсидьиэнигэр Винер Ирина Александровнаҕа улахан махталбытын тиэрдэбит" – диэн эттэ.
Ксения Дудкина курдук үрдүк таһымнаах спортсмен, уһуйааччы Саха сирин хамаандатын ыларга сөбүлэспитэ – улахан табыллыы. Онон, оҕолор ыам ыйыттан Москваҕа Новогорскай олимпийскай базатыгар олорон дьарыктарын саҕалыахтара.
Хаартыска: Мария Васильева. ЯСИА
