От ыйын 3-8 күннэригэр Кыыс Аммаҕа Саха сирин норуоттарын VII спортивнай оонньуулара ыытыллаллар. Манна 2734 спортсмен уонн тренер кыттыыны ылыахтара. Ону таһынан, өрөспүүбүлүкэ араас муннугуттан 15 тыһ кэриҥэ ыалдьыт кэлэрэ күүтүллэр.
Спортсменнар успуорт 16 көрүҥэр: боксаҕа, тустууга, чэпчэки атлетикаҕа, остуол тенниһигэр, баскетболга, волейболга, буулдьанан ытыыга, спортиҥҥа, оҕунан ытыыга, саахымакка, мини-футболга, адаптивнай успуортка чэпчэки атлетикаҕа уонна волейболга, пляжнай волейболга, аэробикаҕа күөн көрсүөхтэрэ. Амма улууһун баһылыга Николай Архипов иһитиннэрбитинэн, Амма спортсмена кыайдаҕына улуус дьаһалтата сир учаастагын бэлэхтиир. Ону таһынан, успуорт бырааһынньыгын аһыллыытыгар уонна сабыллыытыгар льготалаах нэһилиэнньэ босхо сылдьар.
Спортивнай оонньуулар өрөспүүбүлүкэ араас улуустарыгар түөрт сылга биирдэ ыытыллаллар. Аммаҕа былырыын буолуохтааҕын улахан алдьатыылаах, хоромньулаах халаан уута кэлэн бу сылга көһөрбүттэрэ.
Улууска маннык улахан тэрээһин ыытыллара улуус социальнай-экономическай сайдыытыгар улахан оруоллаах. Ол курдук, Аммаҕа адаптивнай успуорт көрүҥнэригэр аналлаах успуорт саалата тутуллан үлэҕэ киирдэ. Ону таһынан, Бөтүҥ нэһилиэгэр 220 миэстэлээх оскуола, Чапчылҕаҥҥа успуорт саалата ааннарын тэлэччи астылар. Үөрэх уонна социальнай эбийиэктэр, суол өрөмүөннэннилэр. Манна спортсменнар олоруохтара. Нэһилиэнньэлээх пууннары толору хааччыйыыга үгүс үлэ ыытылынна. 2500 тахса мас, 300 тыһ кэриҥэ сибэкки олордулунна. “Куттала суох уонна хаачыстыбалаах суол” диэн национальнай бырайыак чэрчитинэн “Амма” тыраассатыгар өрөмүөн үлэтэ барда. Бэдэрээтчиттэр иһитиннэрбиттэринэн, бу сылга былааннаммыт үлэ барыта оҥоһуллан олоххо киириэхтээх.
“Демография” национальнай бырайыак иһинэн “Успуорт – олох нуормата” диэн эрэгийиэннээҕи бырайыагы олоххо киллэриигэ улахан үлэ ыытыллар. Ол түмүгүнэн өрөспүүбүлүкэҕэ успуорт биэс улахан эбийиэгэ тутуллуохтаах, “ГТО” Бүтүн Арассыыйатааҕы физкультурнай-спортивнай комплексын тест оҥорор кииннэригэр успуорт 37 былаһаакката оҥоһуллуохтаах. Бу сорук 2024 сылга диэри успуордунан дьарыктанар дьон ахсаанын 55% диэри элбэтиэхтээх.
2022 сылга ЯАССР тэриллибитэ 100 сылыгар Саха сирин норуоттарын спортивнай оонньуута Уус Алдан улууһугар ыытыллыа.
СӨ Ил Дарханын уонна Бырабыыталыстыбатын пресс-сулууспата
