Саха Өрөспүүбүлүкэтин Физическэй култуураҕа уонна успуорка миниистирэ Леонид Спиридонов уонна көҥүл тустууга норуоттар икки ардыларынааҕы кылаастаах успуорт маастара Виктор Рассадин ыҥырыытынан, бэс ыйын 8 күнүгэр олимпийскэй чөмпүйүөн Роман Власов кэлиэҕэ. Бу туһунан СӨ Успуорка министиэристибэтэ иһитиннэрэр.
Икки төгүллээх олимпийскэй чөмпүйүөн, үс төгүллээх аан дойду чөмпүйүөнэ уонна призера, түөрт төгүллээх Дьобуруопа чөмпүйүөнэ, греко-римскэй тустууга Арассыыйа үтүөлээх маастара Роман Власов кэлэн, «Модун» успуорт комплексын саалатыгар успуорт оскуолаларын иитиллээччилэригэр маастар-кылааһы көрдөрүөҕэ. Ол кэнниттэн, кини Р.М. Дмитриев аатынан олимпийскэй резерв училищетыгар сылдьыаҕа уонна эдэр тустууктары кытта көрсүһүөҕэ.
«Роман Власов бэйэтин дьаныардаах үлэтинэн уонна тустууга муҥура суох бэриниитинэн олус элбэх наҕарааданы уонна норуот тапталын ылбыта. Кини ыгым күннээҕи графиктаах даҕаны буоллар, биһиги ыҥырыыбытын ылынна уонна Дьокуускайга кэлэ сылдьарга сөбүлэҥин биэрдэ. Үгүс спортсменнарга Роман – тыыннаах легенда, чаҕылхай холобур, оттон успуорка маҥнайгы хардыыларын оҥорор эдэр спортсменнарга – улахан көҕүлүүр күүс, кинилэр бу күнү үйэ саастарын тухары өйдүү-саныы сылдьыахтара», - диэн успуорт миниистирэ Леонид Спиридонов этэр.
