Сомоҕолоһуу сылыгар Уус-Алдан улууһун I Хоро нэһилиэгэр саҥа успуорт саалата арылынна. Улуустааҕы дьаһалта пресс-сулууспата иһитиннэрэринэн, саҥа эбийиэк “Мин Сахам сирэ XXI үйэҕэ” үтүө дьыала бырагыраамматын чэрчитинэн тутуллубут. Эбийиэк толору хааччыллыылаах, сыгынньахтанар сирдээх, дуустаах уонна үлэһиттэргэ аналлаах хостордоох. Соторутааҕыта манна саҥа хочуолунай үлэҕэ киирбитэ.
Успуорт саала үөрүүлээх арыллыытыгар олохтоохтору улуус, нэһилиэк салалталара, успуорт федерацияларын, уопсастыбаннай түмсүүлэр бэрэстэбиитэллэрэ эҕэрдэлээтилэр уонна инвентарь ыларга сэртипикээттэри туттардылар.
“Улууспутугар өссө биир суолталаах күн үүммүтүнэн эҕэрдэлиибин. Успуорт саала тутуллуута барыбытын сомоҕолоото диэтэхпинэ, бука, сыыспатым буолуо. Нэһилиэнньэ уонна дьаһалта биир соруктаах, бэйэ-бэйэлэрин өйөһөн үлэлээтэхтэринэ түмүгэ өр күүттэрбэт. Бу курдук инникитин бары түмсүүлээхтик үлэлээтэхпитинэ, 2022 сылга улууспутугар ыытыллар саха норуотун успуорт оонньууларын дьоһуннук көрсүөхпүт диэн эрэнэбин”, – диэн улуус баһылыга Алексей Федотов бэлиэтээтэ.
Санатабыт, Чараҥ сэлиэнньэтэ Бороҕонтон чугас сытар. Онон 2022 сылга буолар саха норуотун VIII успуорт оонньуулара саҥа саалаҕа эмиэ ыытыллыахтара. Эбийиэги оонньуулар өрөспүүбүлүкэтээҕи тэрийэр кэмитиэтэ көрбүтэ.
Сэлиэнньэ бастыҥ спортсменнарынан киэн туттар. Манна Аан дойду уонна Европа түһүлгэлэрин призердара олороллор. Оттон нэһилиэк талыллыбыт хамаандата улуустааҕы спартакиадалар хас да төгүллээх призера.
