Илья Сергеев
-
-
Сахам оҕуһа
Мин сахам олус аатырбыт оҕуһа
Уу дьоруо тэтимнээх хаамыылаах,
Аттардыын тэҥ сыһа айаннаах,
Туохха да тэҥнэммэт дьоҕурдаах,
Мин сахам оҕуһа барахсан,
Саха киһитин эрэллээх доҕоро.
Хоро оҕонньор мииммит көлөтө,
Номоххо киирбит сурахтааҕа,
Айана ахсым ат курдук аллааҕа,
Үһүйээн кэпсээнин кырдьыга,
Мин сахам оҕуһа барахсан,
Саха киһитин чаҕылхай сулуһа.
Тардыылаах бастыҥа тэтиэнэх,
Үлэһит ааттаах үтүөтэ кунаным,
Айана биир күдьүс тэтимнээх,
Эстибэт-быстыбат эрчимнээх,
Мин сахам оҕуһа барахсан,
Саха киһитин үйэлээх бэлэҕэ.
Айаатыаҕа, алаатыаҕа алааспар,
Өрүүтүн сылдьыаҕа мин таспар,
Күүстээх-уохтаах да бэйэлээх,
Быстыбат да сындааһыннаах,
Мин сахам оҕуһа барахсан,
Саха киһитин бэлиэлээх миҥэтэ.
Уус-Алдан улууһа, Бастакы Хоро нэһилиэгэ
Сэҥээриилэр