Бэҕэһээҥҥиттэн доруобуйам туруга арыый мөлтөөн, сөтөл киирэн, төбөм ыалдьан, били абааһы ыарыытыгар балыйан, анаалыс туттарарга сананным. Бүгүн "Өрөгөй" ("Триумф") успуорт комплексыгар, саҥа хоруона вируһун түргэнник быһаарар ПЦР анаалыһын туттара тиийдим.
"Өрөгөй" таһыгар, дьэ, массыына бөҕө турар эбит.
Киирэр ааҥҥа илиибин испииринэн ыстардылар, температурабын мээрэйдээтилэр уонна:" Түргэнник итиннэ баран тур, эйиигин ыҥырыахтара",- диэтилэр. Ыксалбар буолан, киирэр ааҥҥа турар үлэһити хаартыскаҕа түһэрбэтим. Чэ, ити хааллын. Киирээт, докумуону толорууга уочаракка турдум. Толору харысхаллаах таҥаһы, маасканы кэппит мэдиссиинэ үлэһитэ кэлбит дьон бэйэ-бэйэбититтэн тэйиччи турарбытын дьаһайда.
Субу курдук, дьону учуоттуур хас даҕаны туочука үлэлиир эбит.
Ыҥырбыттарыгар, тиийэн "согласие" толордум, илии баттаатым. Үлэһит киһи пааспарбын, СНИЛС-пын, мэдиссиинискэй полиспын бэлэмниирим туһунан эттэ.
Салгыы, анаалыһы туттара диэн, «кэтэһэр саалаҕа» аастым. Манна киириибэр, илиибин эмиэ антисептигынан ыстардылар, электроннай уочаратым кумааҕытын туттардылар.
Киһи элбэҕэ буолуо дии санаабытым, хата, маннык кураанах кэриэтэ «кэтэһэр саалаҕа» киирдим.
Экраҥҥа уочаратым чыыһылата тахсарын кылгастык кэтэстим.
Салгыы, бириэмэм кэлэн, гардероб оннугар үөдүйбүт миэстэҕэ анаалыс туттара тиийдим. Мэдиссиинэ үлэһитэ уһун синньигэс баалачканан муруммуттан анаалыс ылла. Онтукатын ампула курдук иһит түгэҕэр булкуйар курдук гынна.
Онтон, лабараан анаалыстаах баалачканы түргэнник быһаарар тэрилгэ (экспресс тиэскэ) аҕаата быһыылаах (өйдөөн да көрбөккө хааллым).
Онтон, анаалыстары туттарбыттары "Өрөгөй" улахан саалатыгар киллэрдилэр. Манна киирэрбитигэр, тимир хаххаларынан тулаламмыт синньигэс көрүдүөр курдугунан хаамтыбыт. «Тестеры илиигэр көнөтүк тутан киирээр», - диэбиттэрин иһин, эмиэ соло булбакка, киирэр сирбин хаартыскаҕа түһэрбэтим. Тэйиччинэн-чугаһынан тимир хаххалаах оҥоһуу көрүдүөр хас даҕаны баар эбит. Быһата, киһи бэйэ-бэйэтиттэн тэйиччи, мэһэйдэһиитэ суох сылдьарын бэркэ толкуйдаабыттар.
Дьэ, улахан саалаҕа киирэн баран, анаалыстаах тестербын туппутунан, 15 мүнүүтэ кэтэһэн олордум. Тас өттүгэр киһи аҕыйах эбит буоллаҕына, манна ыалдьыбытын суоҕун билиэн баҕалаах арыый элбэх буолан биэрдэ.
Уон биэс мүнүүтэм ааһа охсон, аллара түстүм. Үлэһит киһи ханнык остуолга барарбын ыйан-кэрдэн биэрдэ.
Дьэ, "һуу" диэххэ! Лабараан анаалыспын «үчүгэй» диэн быһаарда уонна:"ОРВИ-нан ыалдьыбыт дьон саалаларыгар ааһаҕыҥ", - диэтэ.
Субу остуоллар анараа өттүлэригэр турар аптамааттан уочараттыыр кумааҕыбын ыллым. Маныаха, биир анаммыт мэдиссиинэ үлэһитэ көмөлөстө.
Бу саала уҥа өттүнээҕи хайысхатыгар анаалыстара "+" буолбут дьон киирэр эбит. Тэйиччинэн ааһан иһэн, кистээн хаартыскаҕа түһэрдим.
Анаалыстара "-" дьон мэдиссиинэ үлэһиттэригэр тиийэллэр эбит.
Уочаратым тута кэлэ охсон, "4-с" нүөмэрдээх остуолга тиийдим. Медбыраат ханна үлэлиирбин, киммин-туохпун, аадырыспын туоһуласта, дабылыанньабын уонна хааммар кислоруоппун мээрэйдээтэ.
Терапевт-быраас күөмэйбин көрдө, турукпун ыйыталаста, хаһааҥҥыттан ыалдьыбыппын туоһуласта уонна эмп ырысыабын суруйан биэрдэ.
Онтон, "ыалдьыбатахтарга" анаммыт сиринэн тахсан истэхпинэ, мэдиссиинэ үлэһитэ илиибин антисептигынан ыстарда.
"-" анаалыстаахтар үөрэ-көтө "Өрөгөй" биир кытыытынан таҕыстыбыт.
Доҕоттоор, ыалдьымаҥ, харыстаныҥ, эмтэниҥ уонна саҥа хоруона вируһун утары быһыыта ылыҥ!
Эрэпэртээһи бэлэмнээтэ Ираида Коркина-Чугдаара