Арассыыйаттан гранулированнай мас уматыгы Великобританияҕа аҕалыы хааччахтаммытын иһин, бу дойдуга эниэргийэ кириисиһэ дириҥээн биэрбит.
The Telegraph хаһыат суруйарынан, сааҥсыйалартан сылтаан, Арассыыйаттан биологическай умайар эттиги аҕалыы хааччахтаммытын иһин, Дьобуруопаҕа оҥорон таһаарыы кээмэйэ 12-15% кыччаабыт. Онон, Великобритания Арассыыйаттан импорт оннугар суһаллык атын солбудаһыгы буларыгар тиийбит. Оттон аналитиктар сабаҕалыылларынан, гааска уонна элэктэриичистибэ уотугар төлөбүр 50% үрдүөхтээх.
Хаһыакка суруллубутунан, кэлиҥҥи сылларга бырабыыталыстыба өйөбүлүнэн тыһыынча кэриҥнээх олорор дьиэлэр уонна хампаанньаллар гранулированнай мас уматыгынан ититиигэ көспүттэр. Бу биотопливоны сүрүннээн Арассыыйа импортаан аҕалар эбит.
Онон, Арассыыйа утары сааҥсыйалар үөдүйэннэр, Британияҕа гранулированнай мас уматыгын сыаната 25−40% үрдээбит уонна сыаната биир туонна ыйааһыҥҥа 385 фунт стерлинг буолбут (быһа холоон 53 300 солк.).
«Бу содулун атын дойдулар эмиэ билиэхтэрэ...», - диэн UK Pellet Council диэн атыы-эргиэн хампаанньатын салайааччыта Марк Лебус бэлиэтиир.
Билигин Великобританияҕа атыылыы источниктары, маннык уматыгы атыылыан сөптөөх хампаанньалары, тэрилтэлэри көрдүүллэр.
The Telegraph чопчулаабытынан, дьиэлэр улахан аҥаардара гааһынан ититинэллэр эбит. Маныаха, гааһы туттуу иһин төлөбүр 5 төгүл үрдээбит. Эспиэрдэр этэллэринэн, аныгыс ыйга элэктэриичистибэ уонна гаас сыаната 50% үрдээри турар.
«Биһиги энергетическэй кириисискэ чахчы киирдибит», - диэн Лебус суоһурҕаммыт.
