«Кыһын Саха сириттэн саҕаланар» бэстибээл чэрчитинэн, «Бриллианты Якутии» диэн муустан уонна хаартан оҥоһуктарга күрэх ыытыллар. Манна Саха сирин улуустарыттан уонна Дьокуускайтан 20-чэ хамаанда кыттыыны ылар. Үлэлэр тематикалара аан дойдутааҕы кинематография уонна Саха АССР төрүттэммитэ 100 сылыгар сыһыаннаахтар.
Үс араас куонкурус ыытыллар: блиц-турнир, муустан уонна хаартан скульптуралар күрэхтэрэ. Быйыл, хамсыктан сылтаан, куонкуруска тас дойдуттан уонна атын эрэгийиэннэртэн кыттыыны ылааччы суох.
«Кыттааччыларга 90 туонна муус бэлэмнэниллибит, бу былырыыҥҥытааҕар 40 туоннанан элбэх. Куонкурус Дьокуускай аннынан, Өлүөнэ өрүс үрдүгэр, муус куоракка ыытыллар. Манна оҥоһуктар муус устар ортотугар диэри туруохтара», - диэн куорат салалтатын пресс-сулууспата кэпсиир.
Леонид Ким аатынан Дьокуускай куораттааҕы ойуулуур-дьүһүннүүр оҕо оскуолатын преподавателлэрэ Николай Колодезников уонна Роман Шадрин алтыс төгүлүн бу күрэххэ кытталлар. Кинилэр хамаандалара АХШ аатырбыт режиссера Джеймс Кэмерон «Аватар» киинэтин дьоруойдарын оҥоро сылдьаллар.
«Киинэҕэ көстөр экология балаансатын харыстыыр туһунан өй-санаа биһиэхэ чугас. Биһиэхэ мууспут мас уонна уҥуох курдук матырыйаалынан буолар. Үлэбитигэр электропиланы уонна стамесканы туттабыт. Муус – кэбирэх матырыйаал, быйылгы сэтинньи ыйбыт сылаас күннэригэр ол ордук билиннэ», - диэн куонкурус кыттыылаахтара кэпсииллэр.
