“Авиалесоохрана” парашютист-баһаарынайдары бэлэмниир икки ыйдаах кууруһу түмүктээтэ. Бу туһунан СӨ экология министиэристибэтин пресс-сулууспата иһитиннэрэр.
Дьокуускайга 160 парашютист-баһаарынайдар, десантниктар анал бэлэмнэниини аастылар. Маннык эрчиллиилэр сыл аайы ыытыллаллар. Курсаннар икки ый устата теорияҕа, быраактыкаҕа уонна мэдэссиинэ хамыыһыйатыгар экзээмэннэри туттардылар.
Саамай эппиэтинэстээх уонна долгутуулаах парашютунан ыстаныы буолар. Хаҥалас улууһун Ой нэһилиэгэр ДОСААФ аэродромугар Ан-2 сөмөлүөттэн, оттон Маҥан бөһүөлэгэр бөртөлүөттэн ыстаннылар. Уһун уоппуска кэнниттэн парашютист-баһаарынайдар сыл аайы “Лесник-3” парашютунан 12 төгүл, “ПТЛ-72” парашютунан 9 төгүл ыстаналлар. Ол кэнниттэн ый устата иккитэ ыстаналлар. Баһаарынайдар ыам ыйын саҥата бэлэм буолуохтаахтар.