Бүгүн, олунньу 26 күнүгэр, үгүс көлүөнэ саха тылын, литэрэтиирэтин уонна төрүт култууратын учууталларын бэлэмнээн, иитэн-такайан таһаарбыт уһуйааччы, тыл билимин дуоктара, литэрэтиирэ кириитигэ, СӨ суруйааччыларын сойууһун чилиэнэ, РФ Педогогическай уонна социальнай билимнэрин академиятын академига, СӨ Билим үтүөлээх үлэһитэ Гаврил Гаврильевич Филиппов 80 сааһын бэлиэтиир.
Г.Г. Филиппов 1944 с. олунньу 26 күнүгэр Бүлүү улууһун Тылгынытыгар төрөөбүтэ. 1962 с. Үгүлээт орто оскуолатын, онтон 1973 с. СГУ саха салаатын үөрэнэн бүтэрбитэ. Кылгас кэмҥэ Тылгыны 8 кылаастаах оскуолатыгар учууталлаабыта. 1974 сылтан күн бүгүнүгэр диэри М.К. Аммосов аат. Саха судаарыстыбаннай университетыгар, кэлин ХИФУ-га үлэлиир. Ол иһигэр кини университетка аҕа уһуйааччынан, дассыанынан, профессорынан (1991 – 2012), Саха филологиятын уонна култууратын факультетын деканынан (1992 – 2003, 2008 – 2010), РФ Хотугулуу-Илиҥҥи норуоттарын тылларын уонна култуураларын институтун дириэктэринэн (2010 – 2015) үлэлээбитэ. 1973 с. саҕалаан саха тылын, литэрэтиирэтин уонна төрүт култууратын исписэлиистэрин бэлэмниир уһуйааччы, Саха өрөспүүбүлүкэтигэр тыл бэлиитикэтин сүрүннээччилэртэн биирдэстэрэ. 200-чэ билим үлэтин ааптара.
1970-с сс. кириитикэ ыстатыйаларын суруйар. Кини суруйуулара “Якутский университет”, “Эдэр коммунист”, “Кыым” хаһыаттарга, “Хотугу сулус” уонна “Чолбон” сурунаалларга бэчээттэммиттэрэ. Кини саха ааҕааччытыгар уус-уран литэрэтиирэ тылын-өһүн ырытааччы быһыытынан эмиэ биллэр. А.Е. Кулаковскай, А.И. Софронов, Н.Д. Неустроев, П.А. Ойуунускай, Н.Е. Мординов, Софрон, Семен Даниловтар, Сергей Зверев, Сергей Васильев, Иван Гоголев, Егор Неймохов уо.д.а. айымньыларын тылын-өһүн ырыппыта.
Гаврил Гаврильевич Филиппов РФ Анал үөрэхтээһинин бочуоттаах үлэһитэ, М.К. Аммосов аат. ХИФУ бочуоттаах бэтэрээнэ, СӨ С.А. Новгородов аат. бириэмийэтин лауреата, РСФСР Үөрэҕириитин туйгуна, “Учууталлар учууталлара”, Тылгыны нэһилиэгин уонна Бүлүү улууһун Бочуоттаах олохтооҕо.
Түгэни туһанан, үгүс көлүөнэ устудьуон тапталлаах уһуйааччытын, төрөөбүт тылбытын барҕардыыга, чинчийиигэ сүҥкэн кылаатын киллэрэ сылдьар Ытык киһибитин кэрэ-бэлиэ сааһынан итиитик уонна истиҥник эҕэрдэлиибит! Ыалдьыбакка-ахсаабакка этэҥҥэ, үлэлии-хамсыы сырыт!
Бэй.кэр.
