Саха тыйаатырыгар “Саха” национальнай көрдөрөр-иһитиннэрэр хампаанньа тэриллибитэ 55 сылын бэлиэтиир үөрүүлээх тэрээһин буолан ааста.
“Дойду хас биирдии ханаала маннык баай устуоруйалаах буолбатах. “Саха” НКИХ кэллэктиибин чаҕылхай үлэтин көмөтүнэн, Саха сирин олохтоохторо өрөспүүбүлүкэҕэ уонна дойдуга туох буола турарын кэмигэр билэ-көрө олорор кыахтаахтар”, — диэн СӨ вице-премьерэ Кирилл Бычков эҕэрдэ тылын эттэ уонна бастыҥ үлэһиттэргэ махтал суруктары туттарда.
СӨ инновацияҕа уонна сибээскэ миниистирэ Анатолий Семёнов “Саха” НКИХ уонна “Якутия 24” ханааллар өрөспүүбүлүкэ үрдүнэн “Россия”, “Первый” курдук федеральнай ханааллары көрүү түмүгүнэн кыайан иһэллэрин эттэ. “230 тыһ дьиэ кэргэн спутник нөҥүө эһиги ханаалгытын көрө олорор. 73 тыһ – “Ростелеком” нөҥүө. Оптоволокно Бүлүү уонна Илин эҥэр улуустарыгар тэтимнээхтик сайдар. Онон сотору кэминэн сыыппараҕа көһөр кыахтаныахтара”, – диэн иһитиннэрдэ.
Ону таһынан, үүнэр сылга сыыппараҕа көһүү боппуруоһа быһаарылларын, оҕолорго аналлаах ханаал тула кэпсэтии барарын туһунан кэпсээтэ. Уонна дата-киин тутуллуо, бу архыыбы оцифровкалыыр уонна харайар аналлаах.
Анатолий Семёнов “Телевидение уонна радио туйгуна” бэлиэни уонна СӨ инновацияҕа уонна сибээскэ министиэристибэтин аатыттан бочуоттаах грамоталары туттарда.
