Өрөспүүбүлүкэ бары оскуолаларыгар, 2020 сыл балаҕан ыйыттан кылаас салайааччылара бары хамнастарыгар эбии 5 тыһ. солк. ылар буолуохтара.
Үөрэх миниистирэ Владимир Егоров эппитинэн, маныаха эрэгийиэннээҕи төлөбүр оннунан хаалыаҕа. “Саха сиригэр 9 тыһ. тахса кылаас салайааччыта баар. Кинилэр эрэгийиэннээҕи төлөбүрү таһынан,эбии 5 тыһ. солк.аахсар буолуохтара. Билигин министиэристибэ өрөспүүбүлүкэҕэ хас кылаас кэмпилиэгэ, хас кылаас салайааччыта баарын чуолкайдыыр”, - диир миниистир Егоров.
Өрөспүүбүлүкэтээҕи төлөбүр туһунан быһаарарыгар,Владимир Анатольевич ити төлөбүр кээмэйигэр педагог үөрэҕин таһыма, хамнаһын акылаата, хотугу уонна оройуоннааҕы коэффициент, кылаас туолуута баһылыыр оруолланарын этэр. Күн бүгүн Саха сиригэр кылаас салайааччылара 700-1000 солк. аахсаллар. Кылаас салайааччыларыгар федеральнай үптэн 5 тыһ. солк. кырата суох хамнаһы биэрэр туһунан дойду бэрэсидьиэнэ Владимир Путин Федеральнай Мунньахха туһаайыытыгар этэн турардаах.
