Ленскэй улууһун Чайыҥдатааҕы ньиэп-гаас баайдаах сиригэр өрөспүүбүлүкэ 270 олохтооҕо «Олохтоох кадрдары — бырамыысыланнаска» бырагыраама чэрчитинэн үлэҕэ киириэҕэ.
Үлэлиэн баҕалаахтар сайаапкаларын СӨ Нэһилиэнньэ дьарыктаах буолуутун өрөспүүбүлүкэтээҕи судаарыстыбаннай кэмитиэтигэр, эбэтэр докумуоннары «СтройТрансНефтеГаз» АУо тэрилтэлэригэр ыытыахтарын сөп.
Ил Дархан Айсен Николаев иһитиннэрбитинэн, номуно бастакы сүүмэрдэммит 59 исписэлиис, бүгүн, атырдьах ыйын 26 күнүгэр, Чайыҥдаҕа үлэлии барбыт.
«Бүгүн «Олохтоох каадырдары— бырамыысыланнаска» бырагыраама иитинэн 59 исписэлиис Чайыҥдаҕа үлэлии барда. Билигин өрөспүүбүлүкэ олохтоохторун үлэнэн хааччыйар сыалтан, «Алмазы Анабара» АУо, «ГазАртСтрой» ООУо, «Стройтрансгаз Трубопроводстрой» ХЭУо-лары кытта ыкса ситимнээх үлэ ыытыллар», — диэн Ил Дархан тоһоҕолоото.
