Бүгүн хомолтолоох сурах кэллэ. 75 сааһыгар философия билимин дуоктара, профессор, уһулуччулаах үтүө киһи Виктор Данилович Михайлов күн сириттэн күрэннэ.
Виктор Данилович Михайлов – Сибиирдээҕи наука Академиятын член-кэрэспэдьиэнэ, философия билимин дуоктара, ХИФУ философия кафедратын бэрэпиэссэрэ, РФ норуодунай үөрэҕириитин туйгуна(1995), СӨ наукатын үтүөлээх деятелэ(1997), РФ үрдүк үөрэҕин бочуоттаах үлэһитэ (2006), СӨ Духуобунас Академиятын дьиҥнээх чилиэнэ, 40-тан тахса сыл араас эйгэҕэ үрдүк таһымнах исписэлиистэри бэлэмнээбит,хас да көлүөнэ устудьуон саамай сэҥээрэр,таптыыр, ытыктыыр уһуйааччыта этэ. Кини 200-тэн тахса араас суруйуулары, ол иһигэр 9 кинигэни, 100-тэн тахса научнай ыстатыйалары суруйан хаалларда.
Кини социальнай философияҕа аатырбыт испсэлиис этэ. Саха сирин култуурунай, духуобунай, бэлитиичэскэй, уопсастыбаннай сайдыытыгар олус улахан кылааты киллэрбитэ, өрөспүүбүлүкэ улахан аптарытыаттаах эспиэрэ этэ.
Виктор Данилович "Кыым" ыкса доҕоро этэ. Кини 75 сааһын туоларыгар биэрбит интервьютун бу сигэнэн кирэн ааҕыҥ https://kyym.ru/sonunnar/don/7302-viktor-mikhajlov-tamarabar-makhtalym-mu-ura-suokh
Виктор Данилович дьиэ кэргэнигэр, чугас дьонугар, кэллиэгэлэригэр, үөрэппит оҕолоругар дириҥ кутурҕаммытын тиэрдэбит.
