Бүгүн, тохсунньу 25 күнүгэр, сарсыарда 5:20 чааска, Дьокуускай аэропуордугар биллибэт аадырыстан сөмөлүөттэр миинэлээхтэрин туһунан сааныы сурук кэлбит. Бу туһунан, тэрилтэ пресс-сулууспата иһитиннэрэр. Ааптара суох сурукка, Дьокуускайтан Москубаҕа диэри көтөөрү сылдьар бары сөмөлүөттэр миинэлээхтэр диэн этиллибит эбит.
«Миэстэтигэр, бэрэбиэркэлиир соруктаах исписэлиистэр кэлбиттэрэ. Бу кэмҥэ, аэропуорт буолуохтааҕын курдук үлэлии турбута, ол эрээри, бары кутталы суох оҥорор миэрэлэр тутуһуллубуттара, антитеррористическэй тэрээһиннэр ыытыллыбыттара», - диэн пресс-сулууспаҕа бэлиэтииллэр.
Билиҥҥи туругунан, бэрэбиэркэ түмүктэммит, оттон көтөр аалларбытыгар эстиэн сөптөөх кутталлаах эттиктэри булбатахтар. Сөмөлүөттэргэ миинэ баарын туһунан иһитиннэрии сымыйанан ааҕыллыбыт. Итинтэн сылтаан, Дьокуускай-Москуба эриэйсэлэрэ хойутаан көттүлэр.
Бу иннинэ, тохсунньу 15 күнүгэр, «Алроса» электроннай почтатыгар эмиэ манныкка майгынныыр, биллибэт аадырыстан сааныылаах сурук кэлбитэ. Онуоха, исписэлиистэр кэлэн, сөмөлүөттэри бэрэбиэркэлээбиттэрин түмүгэр, туоха даҕаны кутталлаах эттик баара биллибэтэҕэ.
Маны таһынан, тохсунньу 17 күнүгэр, эмиэ биллибэт аадырыстан Томпо Дьабарыкы Хайатын чох шахтатыгар теракт оҥоруохпут диэн сааныы сурук кэлбитэ. Маныаха, исписэлиистэр шахтаны чинчийбиттэрин түмүгэр, куттал баар сибикитэ көстүбэтэҕэ.
Сотору кэминэн, тохсунньу 20 күнүгэр, Дьокуускай куорат сорох оскуолаларыгар уонна устудьуоннар уопсайдарыгар миинэлэр баалларын туһунан сымыйа суруктар кэлбиттэрэ.
Маннык ис хоһоонноох суруктар Арассыыйа үрдүнэн 2019 сыллаахтан кэлитэлииллэр эбит. Биллибэт дьон, биллибэт электроннай аадырыстартан сааныылаах, ол-бу атыы-эргиэн кииннэригэр, оскуолаларга, маҕаһыыннарга, үөрэх кыһаларыгар, баксаалларга уонна аэропуордарга кэлбиттэрэ биллэр. Бу суруктары, быһаарбыттарынан, сүрүннээн тас дойдулартан ыыталыыллар эбит. Олортон сорохторун Арассыыйа ФСБ-ра аны ыыппаттарын курдук, «хатаабыттар».
