От ыйын 1 күнүгэр киэһэ хойут, Кэбээйи улууһугар дьон түүҥҥү халлааҥҥа туох эрэ биллибэт сырдык сурааһын, уот сыдьаайын көрөн соһуйдулар-өмүрдүлэр. Бассаап социальнай ситиминэн бу сонун Саха сирин биир гына тилийэ көттө.
Кыым хаһыат эрэдээксийэтэ Айылҕа Харыстабылын министиэристибэтигэр эрийэн, туох буолбутун сурастылар.
Биэдимэстибэттэн маннык хоруйдаатылар:
2021 сыл, от ыйын 1 күнүгэр, киэһэ 21 ч. 48 мүн. «Восточнай» космодромтан «Союз-2.1б» таһаарааччы-ракета (ТР) көмөтүнэн, космическай аппарааттар орбитаҕа көттүлэр.
Ракетаны ыытыы үгэс буолбут эрэсииминэн ааста. Арахсар чаастара эрдэттэн бэлиэтэммит сирдэригэр түстүлэр. ТР бастакы сүһүөҕэ Амурскай уобаласка түстэ, оттон иккис сүһүөх арахсар чаастара Саха сирин Алдан уонна Кэбээйи оройуоннарыгар суулуннулар. Саха сиригэр таһаарааччы ракета кырамталара түһэр түөлбэлэринэн, Алдан уонна Кэбээйи оройуоннарыгар кута-маар уонна хайа сирдэрдээх , дьон олорбот сирдэрэ анаммыттара.
Арахсыбыт чаастар кырамталара өрөспүүбүлүкэ сиригэр-уотугар номнуо көһүннүлэр, тустаах экологическай анаалыс ылылынна.
Радиацияны уонна тулалыыр эйгэни киртитэр токсичнай эттиктэри быһаарар экспресс-тестар үчүгэй түмүгү көрдөрдүлэр.
Таһаарааччы ракета көтүүтэ араас «атмосфернай оһуордар» көстүүлэринэн арыалланна. Бу инверсионнай суол диэн ааттанар (сөмөлүөт кый ыраах үөһээнэн көтөн иһэн хаалларар сурааһын суолун курдук).
Тулалыыр эйгэҕэ, нэһилиэнньэ олоҕор уонна доруобуйатыгар куттал суох.
АО «ЦЭНКИ» - НИИ СК ( "ЦЕНТР ЭКСПЛУАТАЦИИ ОБЪЕКТОВ НАЗЕМНОЙ КОСМИЧЕСКОЙ ИНФРАСТРУКТУРЫ" - "НАУЧНО-ИССЛЕДОВАТЕЛЬСКИЙ ИНСТИТУТ СТАРТОВЫХ КОМПЛЕКСОВ ИМЕНИ В.П. БАРМИНА")
