«Алмазный край» телеканал Мииринэйгэ СОVID-19 сутуллубут ыарыһахтар балыыһаларыгар тиийэ сылдьан биэрии устубут. Ол туһунан суруйабыт.
Мииринэйгэ СОVID-19 сутуллубут ыарыһахтар балыыһаларыгар оҕолор киирэллэрэ элбээтэ. Быыстарыгар эһээхий оҕолор бааллар. «Кыһыл зонаҕа» үлэлиир быраастар этэллэринэн, ыарыы кими даҕаны аһыммат. Реанимацияҕа биир үксүн быһыыны ылбатахтар киирэллэр эбит.
Чахчыта даҕаны, «уоһугар үүтэ куура илик» кып-кырачаан киһи улахан дьону кытта балыыһаҕа сытар. Икки ыйдаах Лера - СОVID-19 сутуллубут ыарыһахтар балыыһаларыгар саамай эдэрдэрэ. Эһээхий кыысчаан ийэтинээн саҥа хоруона вируһунан сутуллубуттар, ыарыы тыҥаларыгар тиийэ охсубут. Оҕо тыҥатын сиэтиитэ 1%, оттон ийэтин киэнэ 20%.
САРГЫЛАНА БУРНАШОВА-инфекционнай стационар сэбиэдиссэйэ:
- Бастаан улахан дьон, төрөппүттэр ыалдьаллар, ол кэннэ оҕо. Биһиги салаабытын нөҥүө хас даҕаны оҕо ааста.
Балыыһа бу салаатыгар ким-ким суоҕай. Бүгүн – 129 киһи. Бу Наталья Хобина СОVID-19 ыалдьыбыт дьон куойкатыгар алтынньы ый бүтэһигиттэн быһа сытар. Биэнсийэлээх – ыарахан туруктаах ыарыһах. Тыҥатын сиэтиитэ үс күн иһигэр 10%-н 50%-ҥа тиийэ улаатта. Наталья аттыгар мэлдьи эбии кислоруоду биэрэр аппарат турар. Тыынара ыарахан, кэпсэтэригэр өссө эбии уустук. Быһыыны ылбатах.
НАТАЛЬЯ ХОБИНА – КОВИД ЫАРЫҺАХТАР КИИННЭРИН ЭМТЭНЭЭЧЧИТЭ:
-Миэхэ ревматоиднай артырыыттан сылтаан быһыыны ыларга медотвод баар этэ. Таҥара көмөтүнэн этэҥҥэ буолуом уонна 6 ыйынан хайаан даҕаны быһыыны ылыаҕым. Булгуччу. Ол кэннэ хаттаан эмиэ ылыаҕым. Биһиэхэ өссө пневмоккок утары быһыы баар. Араас быһыы баар, хайата бэриллэринэн. Бэйэбитин харыстанарбытыгар.
Киниттэн интервью ылар кэмнэригэр реанимацияҕа сүпсүлгэн бөҕөтө. Киһи өлөн эрэр. Быраастар быыһыы сатаабыттар даҕаны, хомойуох иһин кыаллыбатах.
Хамсык үһүс долгуна мэдиссиинэ үлэһиттэригэр үлэ бөҕөтүн эптэ – Мииринэйдээҕи реанимация салаатыгар ыарыһахтар куойкалара икки төгүл элбээтэ – 24 буолбут. Билигин биир даҕаны аһаҕас миэстэ суох. Тоҕо диэтэр тыҥаҕа кислоруод киллэрэр аппарааты араарбаттар.
Реанимацияҕа быһыыны ылбыт дьон саҥа хоруона вируһунан ыалдьан эмиэ киирэ сылдьыбыттар. Биир эр киһини аҕалбыттар, кини быһыыны бастакытын эрэ ылбыт да буоллар үтүөрбүт эбит. Ол эрэн маннык көстүү олох сэдэх эбит, ордук элбэхтэ быһыыны ылбатах дьон ыалдьар.
САРГЫЛАНА БУРНАШОВА- инфекционнай стационар сэбиэдиссэйэ:
- Дьон сыыһа санаалаах. Быһыыны ыллыбыт даҕаны ыалдьыбаппыт диэн өйдөбүллээхтэр. Оннук буолбатах. Быһыы киһи ыарыыны чэпчэкитик аһарынарыгар улахан көмөлөөх. Бэл, ыарыы орто дьайыылаахтык охсубут да буоллаҕына киһиэхэ өлөр куттала суох. Ыстатыыстыка уонна кэтээн көрүү этэринэн, «Спутник», эбэтэр «ГамКовидВак» быһыы ордук үчүгэй. Спутник-V быһыыны ылбыт дьон өлүүтэ суох.
Быраастар бигэтик этэллэринэн, нэһилиэнньэ быһыыны ыллаҕына эрэ ыалдьааччы ахсаана уонна киһи өлүүтэ аччыаҕа. Кинилэр дьон олохторугар үчүгэйи оҥорон сөптөөх быһаарыныыны ылыныахтара диэн итэҕэйэ, эрэнэ хаалаллар.
«Алмазный край» телеканалга сюжеты оҥорбуттар: Иванна Филиппова, Алексей Меркулин.
