Саха сирин саамай киэҥ иэннээх оройуона, хотугу улууһа Өлөөн 85 сылын туолбутун кэрэһэлиир өрөгөй күнэ буолан ааста.
Өлөөн улууһа Мииринэй оройуонун кытары сэргэстэһэ сытар. Кини сиригэр – Үөһээ-Муунатааҕы уруудалаах сиргэ Удачнайдааҕы ХБК алмаас хостуур. Итинэн да сиэттэрэн, икки ыаллыы оройуон ыкса, доҕордуу сибээстээхтэр, хардарыта ыалдьыттаһаллар, көмөлөсүһэллэр. Удачнай куоратыттан Өлөөн сэлиэнньэтэ отучча көс ыраах. Кыһыҥҥы суол баар.
Мииринэй олохтоохторо Өлөөҥҥө табаһыт Күнүгэр сылдьалларын сөбүлүүллэр. Хаһан да таба диэни харахтаабатах, хотугу дьүһүмэри төрүт билбэт дьоҥҥо бу сүрдээх сиэдэрэй, умнуллубат кэрэ түгэн.
Быйыл да оннук чаҕылхай бырааһынньык ыытылынна.
Ыалдьыттар Дьокуускайтан, Сааскылаахтан, Удачнайтан кэлитэлээн хотугу сир дьонун ыалдьытымсахтарын, ырыалара-тойуктара кэрэтин, үҥкүүлэрэ дохсунун кэрэхсээтилэр. Олохтоох эдэр талааннар дьэбэйдэлээн дьиэрэстилэр, мончуор-оһуорай добун үҥкүүлэригэр эргийдилэр. Бырааһынньык кэрэ-бэлиэ түгэнинэн Өлөөн табаларын хаамыылара буолла. Былыр, Өлөөн улууһа отучча тыһыынча табалааҕа. Мантан элбэх табаны араас улуустар ыстаадаларыгар хаан уларытыытыгар анаан илдьибиттэрэ. Билигин таба ахсаана кыччаан турар. 2017 сыллаахха биэс тыһыынчаҕа тиийэ таба баара биллибитэ. Ол да буоллар, кэхтиини таһаарбатылар.
Улууска таба ахсаанын хаҥатыыга усулуобуйа төһө кыалларынан тэриллэ сатыыр. Табаһыттары да өйүүллэр. Уопсайынан, бу хотугу улуус, олорор дьиэни уонна социальнай хайысхалаах эбийиэктэри тутууга, эдэр ыччаттары олохсутууга, оптоволокнолаах интэриниэти киллэриигэ бастыҥ көрдөрүүлэрдээх. Бу үрдүкү үбүлүөйү бэлиэтиир үөрүүлээх күҥҥэ улуус сайдыытыгар сорунуулаах кылааттарын киллэрсибит дьону чиэстээтилэр. Тэрээһини иһирэх тыыннаах кэнсиэрт киэргэттэ.
Станислав Алексеев. Мииринэй куората.Өлөөҥҥө буолбут тэрээһинтэн Ариан Саввинов хаартыскалара.
