Эмиэрикэҕэ киэҥник биллибит Бонни Паркер уонна Клайд Берроу диэн ааспыт үйэ 20-30 сс. (“Улуу дэпириэссийэ” кэмигэр) аатырбыт халабырдьыттарын, бандьыыттарын туһунан бары да истибит болуохтааххыт. Дьону өлөрүүгэ, халааһыҥҥа куруук бииргэ киксэн, куомуннаһан “үлэлиир” кэргэнниилэр тустарынан балай эмэ элбэх суруйуу, киинэ таҕыста.
Саха сиригэр Бонни уонна Клайд киэбин кэппит икки паара кириминээл кирдээх устуоруйатыгар эмиэ бэйэлэрин суолларын хаалларбыттара. 2006 сыл сааһыгар Дьокуускайга утуу-субуу дьону кыыллыы өлөрүүлэр тахсыбыттара. Бүгүн биһиги бу хаанынан суруллубут устуоруйаны сэгэтэн көрөбүт.
Кыа хаан сүүрүктээх сандал саас
Бу киһи өйүгэр сатаан батан киирбэт быһылааннар күөдьүйүүлэрэ 2006 сыл муус устар 5 күнүттэн саҕаламмыттара. Ол күн Катерина Борисова уонна Денис Винокуров куорат кырыытыгар турар кэпэрэтиибинэй гараастар сарайдарыгар аһыы утаҕы иһэ олорбуттар. Мэйиилэрин арыгы туймаардан, кинилэр хааннаах дьыаланы оҥорорго санаммыттар...
Муус устар 5 күнэ
Дьокуускайга ити сыл сааскы ылааҥы сылаас күннэр саҕаламмыттара. Арыгы иһэн топпотох Катериналаах Денис куорат кытыытыгар турар кэпэрэтиибинэй гараас харабынайыгар саба түһэн, сампаан бытыылкатынан баһын хампы охсубуттар, онно сөп буолбакка, бүттэтэ суох үлтү кырбаан өлөрбүттэр. Бэйэлэриттэн саастаах харабынай өлүгүн кистиир сыалтан өлүгү соһон таһааран, уоттаан кэбиспиттэр.
Ыам ыйын 25 күнэ
Харабынай тыыныгар туран баран, бу икки киһийдэх буруйу оҥорбуттара биллибэккэ, кыыл киэбин кэтэн салгыы дьон тыыныгар турар соруктарын олоххо киллэрэргэ туруммуттар. Самаан сайын салгынын аҕалбыт Ньукуолун күнүн кэнниттэн Катериналаах Денис салгыы арыгы иһэр баҕаттан, уулуссаҕа дьону кытары билсэн, харчы умналаһар кыдьыктаммыттар. Маҕаһыынтан холуочук туруктаах киһи арыгы атыылаһан тахсан иһэрин көрөн, ымсыырбыт, үтүө харахтарынан албыннаһан, чугасаһан барбыттар. Омос көрдөххө, туох да куттала суох эдэркээн дьону көрөн, Богдан Чижик уулуссатыгар турар элбэх кыбартыыралаах дьиэ хаһаайына “миэхэ баран остуолга олорон абырахтаныах” диэн ыҥырар. Ону эрэ кэтэһэ сылдьыбыт дьон үөрүүнү кытары сөбүлэспиттэр. Дьиэлээх хаһаайын халадыынньыгар баарын барытын ууран, саҥа билсибит дьонун күндүлээбит. Бырааһынньык мааныта саҕаламмыт. Тиһэҕэр тиийэн, махтаныахтарын оннугар, Катериналаах Денис дьиэлээх хаһаайын хабарҕатын хайа соппуттар уонна кыбартыыра иһиттэн туох баар сыаналаах малы – көмүс оҥоһуктары, саҕынньаҕы – тутан тахсыбыттар...
Бэс ыйын 15 күнэ
Быраабы араҥаччылыыр уорганнар илиилэригэр тутуллубатах, накаастабылы билбэтэх Катериналаах Денис иитиэхтээн сылдьыбыт санааларын салгыы толорорго быһаарыммыттар. Били, Богдан Чижик уулуссатыттан дьиэлээх хаһаайыны өлөрөн баран халаабыт малларын иһэн-аһаан баран, салгыы атын сиэртибэни көрдүү барбыттар. Дьылҕа Хаан ыйааҕа бу икки абааһыны 202-с түөлбэ 50 саастаах олохтооҕун кытары тиксиһиннэрбит. Дьиэлээх хаһаайын хабарҕатын хайа соппуттар уонна сыаналаах малы-салы уоран баран, уот аспыттар...
Туоһулар бу икки сиэртибэ өлөр күннэригэр икки эдэр киһини кытары суксуруһа сылдьалларын көрбүттэрэ биллибит.
Дьокуускай куорат борокуратууратын силиэстийэлиир бөлөҕө уонна куораттааҕы Ис дьыала министиэристибэтин управлениетын холуобунай ирдэбилэ тэҥҥэ ыыппыт силиэстийэлиир-оперативнай дьаһалларын кэннэ, өлөрүөхсүттэр суолларыгар тахсыбыттар. Чочумча буолаат, киин куорат олохтоохторо – Винокурова уонна Борисов – тутуллубуттар.
Уорбаланааччылар оҥорбут буруйдарын тута билиммиттэр уонна эмсэҕэлээччилэри кытары бастаан арыгы иһээри билсибиттэрин, ыалдьыттыы киирэн баран, этиһии кэнниттэн кыдыйбыттарын кэпсээбиттэр. Суукка биир сүрүн дакаастабыл уорбаланааччылартан биирдэстэрин дьиэтин дьэҥдьийэ сылдьан уоруллубут мал сороҕун булан ылбыттара буолбут. Онон силиэстийэ саҕаланыаҕыттан Катериналаах Винокуров буруйдаахтара биллэрэ, ол эрээри кинилэри өссө үчүгэйдик сыныйан көрөр наада этэ. Тоҕо диэтэххэ, бу киһийдэхтэриҥ ис-истэриттэн соччо судургу буолбатахтара эрдэттэн көстөрө.
Гиипсэ туттарбыта
Винокурова уонна Борисов ол күн тутуллубатахтара буоллар, салгыы өссө хас киһи хабарҕатын быһан өлөрүөхтэрэ биллибэт этэ.
Оперативниктар уонна силиэдэбэтэллэр бу икки абааһы суолугар олох алҕаска тахсыбыттар. 202-с түөлбэҕэ тахсыбыт өлөрүү сириттэн криминалистар илии гиипсэтин тоорохойун булан ылаллар. Ону туппутунан оперативниктар Суһал мэдиссиинэ көмөтүн киинигэр (РБ2) тахсаллар. Онно биллибитинэн, уорбаланааччылартан биирдэстэрэ илиитин тоһутан гиипсэлэтэ сылдыбыт эбит. Онон кинилэр өлөрбүттэригэр туох да саарбахтааһын суоҕа. Маны таһынан, өлүөхсүт Борисова аймаҕа буолара биллибит. Инньэ гынан дьиэлээх хаһаайын тугу да сэрэйбэккэ дьиэтигэр киллэртээбит уонна өлөр суолун булбут.
Бонни уонна Клайд: кимнээхтэрий?
Бу паара туһунан “сүөһү эриэнэ таһыгар, киһи эриэнэ иһигэр” диэн чопчу этиэххэ сөп. Борисова уонна Винокуров куоракка олохтоох толору, сэниэ ыалга улааппыттар. Иккиэн оскуола кэннэ университекка үөрэнэ сылдьыбыттар, ол эрээри ситэ үөрэммэккэ үүрүллүбүттэр. Винокуров физмат хайысхалаах оскуоланы бүтэрбит, сүрдээх киэҥ билиилээх, элбэҕи эрэннэрэр уол эбит. Кэргэннэнэ сылдьыбыт, икки оҕолоох. Ойоҕуттан арахсан баран, Борисованы кытары булсубут. Иккиэн дьиэтэ-уота суох, ускул-тэскил сылдьыбыт буолан куорат биир элбэх кыбартыыралаах дьиэтин этээстэрин икки ардыгар баар кыра хайаҕаһы булан олохсуйбуттар. Быһата, куорат хаамаайылара этилэр.
Тас көрүҥнэриттэн көрөн ким да кинилэри өлөрүөхсүттэр сылдьаллар дии санаабат: Винокуров – ачыкылаах, ырыган, интэлигиэн көрүҥнээх. Дьахтар наар үс муннуктаах хара былааты баана сылдьар буолара үһү. Уһун синньигэс моойдоох, билиини ситэ ылбатах устудьуон курдук чоҕулуччу көрөн кэбиһэр эдэркээн дьахтар.
Борисова эмиэ оҕолоох эбит. Кини оҕотуттан аккаастаммыт, төрөппүттэригэр хаалларан баран, дьиэтиттэн тахсан барбыт. 25 сааһыгар номнуо буор иһээччи буолаахтаабыт. 2005 сыллаахха бииргэ олорор дьээдьэтэ төбөтүн хампы охсон, кырбанан икки төгүл балыыһаҕа сытан тахсыбыт. Бүтэһигин баһын уҥуоҕа ойдон, эпэрээссийэ оҥорторбут. Ол иһин мэлдьи хара былааты баанар эбит. СИЗОҕа сытан Борисова иккис курууппалаах инбэлииккэ тахсар. Төбөтүгэр улахан баастаах киһи туох аанньа буолуой...
Бириигэбэр
Борисова уонна Винокуров тутуллубуттарын кэннэ, кинилэри тута “саха Боннилаах Клайда” диэн ааттыы охсубуттара. 2007 сыл тохсунньу 31 күнүгэр Саха Өрөспүүбүлүкэтин Үрдүкү суута Винокуров Д.Н. уонна Борисова Е.П. тэриллибит холуобунай дьыаланы көрөн түмүктээбитэ.
Суут бириигэбэри таһаарарыгар судаарыстыбаннай буруйдааччы диэки буолбута уонна Денис Винокуровы киһини соруйан өлөрүүгэ 3 түгэҥҥэ, киһиэхэ ыар эчэйиини оҥорууга, атын киһи малын уорууга – икки түгэҥҥэ, атын киһи малын соруйан уоттааһыҥҥа буруйдааҕынан аахпыта уонна кытаанах усулуобуйалаах күлүүс хаайыытыгар 23 сылга уураахтаабыта.
Е.П. Борисова суукка куомуннаһан киһини өлөрүүгэ, икки халааһыҥҥа буруйдааҕа толору дакаастаммыта уонна уопсай эрэсиимнээх холуонньаҕа уон сылга утаарыллыбыта.
Маны таһынан, суут иккиэннэриттэн эмсэҕэлээбиттэргэ 243 576 солк. материальнай хоромньуну уонна 450 тыһ. солк. моральнай хоромньуну төлөтөргө уураахтаабыта.
