Айылҕа Харыстабылын министиэрстибэтин пресс-сулууспата иһитиннэрэринэн, Орто Халыма уонна Хаҥалас улуустарыгар сэдэх, кыһыл кинигэҕэ киирбит көтөрдөр быыһаннылар.
Орто Халыма улууһун Сыбатаай нэһилиэгин олохтоохторо Елена уонна кини кэргэнэ, Алаһыай өрүс уҥа биэрэгэр кыната эчэйбит боруллуону буллулар.
Кинилэр этэллэринэн, көтөрү өссө эрдэ көрбүттэр, кэнники күннэргэ ити ыырыттан ырааппатах. Нэһилиэк олохтоохторо тойон көтөр бэйэтэ кыайан бултуур кыаҕа суоҕун бэлиэтии көрөннөр балык быраҕан биэрэн аһатар буолбуттар.
Иһитиннэриигэ этиллэринэн: “Көтөр мөлтөх туруктааҕа бигэтик биллибит, айылҕаҕа сылдьан суорума суолланыаҕын сэрэйэн, амарах санаалаах хоту дойду дьоно Орто Халыматааҕы тулалыыр эйгэни кэтээн көрөр инспекцияттан көмө көрдөспүттэр”.
Боруллуоҕа анаан хоппо оҥорбуттар уонна эриэйсэбэр сөмөлүөтүнэн улуус киинигэр ыыппыттар.
Орто Халыма куоратыгар боруллуону ветеринария салалтатын исписэлиистэрэ чинчийэн көрдүлэр уонна көтөр уҥа кынатын, уҥа атаҕын эчэппитин быһаардылар. Итиэннэ, көтөр аны айылҕаҕа сатаан бултаан-алтаан сылдьыа суоҕа диэн бэлиэтээн туран, анал питомникка туттаралларыгар сүбэлээтилэр.
«Билиҥҥи кэмҥэ боруллуо Орто Халыматааҕы тулалыы эйгэни кэтиир инспекция үлэһиттэрин хараҕын далыгар сылдьар. Сотору айанныырыгар уонна быстах кэмҥэ тутарага анал бэтэринээринэй докумуоннар ситтэхтэринэ, тойон көтөрү өрөспүүбүлүкэтээҕи «Орто Дойду» зоопаркаҕа илдьиэхтэрэ, ирдэнэр көмөнү оҥоруохтара. Көтөрү кинини быыһаабыт дьон Орлик диэн ааттаатылар», - диэн этиллэр иһитиннэриигэ.
Өссө биир эчэйбит кынаттаах, сэдэх, кыһыл кинигэҕэ киирбит көтөрү Хаҥалас улууһугар буллулар.
Иһитиннэриигэ бэлиэтэнэринэн: «Жанна уонна Егор диэн эдэр дьон, суол кытыытыгар туох эрэ тыҥырахтаах көтөр олорорун көрбүттэр. Кыната хааннааҕын көрөннөр, көтөрү тутан ыланнар олохтоох бэтэринээрийэ салалататыгар илдьэннэр, көтөргө бастакы көмө оҥоһуллубут».
Бааһырбыт көтөрү «Орто Дойду» өрөспүүбүлүкэтээҕи зоопаркаҕа аҕалан, туох баар ирдэнэр булгуччулаах көмөнү оҥордулар. Буллуллубут көтөр мохсоҕол бииһин ууһа. Нууччалыыта – чеглок. Мохсоҕолу – кинини быыһыырга быһаччы кыттыгастаах уол аатынан – Гриша диэн ааттаатылар.
Айылҕа Харыстабылын министиэристибэтэ сэдэх, кыһыл кинигэҕэ киирбит көтөрдөрү быыһаабыт амарах санаалаах дьоҥҥо махталын биллэрэр.
