От ыйын 28 күнүгэр, сарсыарда 10 чаас 50 мүнүүтэҕэ, Нерюнгритааҕы «Быыһыыр Сулууспа» пультугар, Чульман бөһүөлэгиттэн 15 км тэйиччи, эр киһи уонна дьахтар очуос таас хайаттан сууллубуттар диэн суһал иһитиннэрии киирбит.
Быыһааччылар быһылаан буолбут сиригэр тиийиилэригэр эмсэҕэлээччилэр ыарахан эчэйии ыланнар, хамсанар кыахтара суох эбит. Бу дьон бэйэлэрэ кэпсээбиттэринэн, кинилэр бу сиргэ сир астыы уонна тэллэйдии диэн ааттаан кэлбиттэр. Очуос таас үрдүгэр ыкса кэлбиттэрин, кыырпах таас бытарыйан хайа сиҥнэн, 12 миэтэрэ үрдүктэн аллараа курулаабыттар. Быыһааччылар, Суһал Көмө биригээдэтэ кэлиэр диэри оһолломмут дьоҥҥо маҥнайгы көмө оҥорбуттар. Дьахтарга шина уурбуттар (сабаҕалаан көрөөһүнүнэн, илиитин тоһуппут), эр киһиэхэ төбөтүгэр хайдыбыт бааска бэрэбээскэ уурбуттар, этигэр-хааныгар тахсыбыт элбэх дьүккү түһүүнү эмтээбиттэр. Иккиэннэрин Суһал Көмө быраастарыгар туттарбыттар.
Оттон киэһэ 18 чаас 10 мүнүүтэҕэ Нерюнгри таһынааҕы ойуур сиһиттэн, биир дьахтар эрийэн мунан хаалбытын туһунан иһитиннэрбит. Тыаҕа муммут киһи олохтоох буолбатах, кыраныысса таһыттан кэлбит ыалдьыт буолан, сири-уоту билбэтэ атахтаабыт. Манна даҕатан эттэххэ, ол күн киһи 50-100 миэтэрэ эрэ ырааҕынан көрөр хойуу буруо турбут. Быыһааччылар, «РОССОЮЗСПАС» волонтердарын кытары икки бөлөҕүнэн хайдыһан, тыаны тараахтаан хааман сүппүт киһини көрдөөбүттэр. Үлэҕэ квадроцикл уонна быыһааччылар анал сигналлаах служебнай массыыналара кыттыспыт. “АСА” массыына анал сигнал холбообутугар, дьахтар ол тыаһынан сирдэтэн быыһааччыларга уун-утары тахсан кэлбит. Эмчиттэр көмөлөрүгэр наадыйбатах.
Быыһааччылар сэрэтэллэр: Тыаҕа бараргытыгар чугас дьоҥҥутун сэрэтэн барар буолуҥ, хаһан, ханна туох сыаллаах-соруктаах бараргытын, хаһан быһа холоон төннөргүтүн.
Ойуурга сылдьан оҕолору көрүүтэ-харайыыта суох хаалларымаҥ. Чаҕылхай өҥнөөх таҥаһы таҥнан бара сатааҥ. Бэйэҕитин кытта уу, туус, испиискэ, хомуллар быһах уонна свисток ылыҥ (иһиирдэххитинэ ыраахха диэри иһиллэр).
Николай Фатеев
Саха сиринээҕи «Быыһыыр Сулууспа» пресс-сулууспата
