Кулун тутар 23 күнүгэр киэһэ 21.27 чааска «112» нүөмэринэн СӨ Быыһыыр сулууспатыгар дьахтар кыыһын кытта Киллэм диэки көмө көрдүүллэрин туһунан иһитиннэрии киирбит. Сулууспа аэромобильнай көрдүүр-быыһыыр салаатын үлэһиттэрэ тута анал массыынанан быһылаан буолбут сиригэр барбыттар.
Онно биллибитинэн, киин куоракка олорор ийэ кыыһын кытта субуота күнү айылҕаҕа атаарарга, Киллэм эргин салгын сиэн баран, мыраан тэллэҕэр хоно хааларга быһаарыммыттар. Ол эрээри кинилэр халлаан туругун учуоттаабатахтар. Кыыс, таҥаһа чарааһын ааһан, оннооҕор үтүлүгэ суох эбит. Онон, дэлби тоҥон, киэһэ турар да кыаҕа суох буолбут. Күүстээх тыалга балааккаларын кыайан туруорбатахтар. Дьахтар ханна сылдьалларын чопчу билбэт эбит. Онуоха аймахтара «112» нүөмэринэн көмө көрдөөбүттэр.
Быыһааччылар ийэлээх кыыһы булаары дрону туһаннылар, быыһыыр массыынан уотун, тыаһын холбоон сырыттылар. «Айанньыттары» мыраан тэллэҕиттэн чугас аһаҕас сиргэ буллулар уонна мэдиссиинэ үлэһиттэригэр туттардылар. Дьахтар туруга этэҥҥэ, оттон кыыһа илиитин үлүппүт.
Сонун төрдө: СӨ Быыһыыр сулууспатын пресс-сулууспата
