Айылҕа харыстабылын миниистирэ Сахамин Афанасьев социальнай ситимнэринэн быһа эпииргэ тахсан баһаар балаһыанньатын тула кэпсээтэ. Кини уоппускаҕа 7 күн сылдьан баран тахсыбыт, сарсын баһаардарга бараары олорорун эттэ.
Кини этэринэн, киинтэн баһаарга үлэлиир көтөр ааллар Мииринэйгэ базаланаллар. Күн-бүгүн 10 ойуур уотун умулларбыттар. Авиалесоохранаттан 734 киһи уоту умулларыыга үлэлии сылдьаллар. Кини этэринэн, АН-26, авиация уонна оҥоһуу ардахтар баһаары умулларыыга туһалара улахан. Быйыл баһаардары бохсууга тиэхиньикэни ыларга 200 мөл. солк. көрүллүбүт. Байыаннай тиэхиньикэ Нам улууһугар үлэлии сылдьарын эттэ, минерилизованнай балаһаны (6 м кэтиттээх хорууну тааҕыта хаһар) оҥоро сылдьар. Бе-200 амфибия-сөмөлүөтэ Дьокуускай аэропордун балаһата түһэрэр кыаҕа суох буолан, Дьокуускайга кыайан базаланар кыаҕа суох. Уопсастыбаннай ыстаап үлэтэ "Кыайыы 50 сылын Дыбарыаһыгар" бэркэ үлэлии олороллорун бэлиэтээтэ уонна махталын биллэрдэ. Сир баайын туһанааччылар Ойуур кодекса ирдииринэн, сири түүлэһэ олорор буоланнар, уот суоһаата да көмөҕө тахсыахтаахтар диэн. Өймөкөөн улууһугар көмүсчүттэр күүскэ үлэлэспиттэрин эппит. Мобилизацияҕа үлэлиир дьоҥҥо дуогабар быһыытынан харчы төлүүллэр, онуоха таабыл эҥин көрүллэр. Бэс, от ыйдарга үлэлэспит дьоҥҥо, дуогабардаах буоллахтарына, улуус суһал ыстааптарыттан уонна Якутлесресурс салааларыттан харчыгытын көрдөөҥ диэн миниистир эттэ. ЕСДМ саайтыгар киирэн баһаар иэнин киирэн көрүҥ уонна суһал ыстаап диспиэччэрдэрэ биэрэр дааннайдарын кытары тэҥнээҥ диэн "ким биэрэр дааннайдарыгар итэҕэйэбит?" диэн ыйытыыга хоруйдаата. Кини этэринэн, сезон саҕаланыыта дааннайдарга сөп түбэспэт буола сылдьыбыттара, билигин оннук буолбатах диир. "Тоҕо сырыы аайы сезоҥҥа бэлэмэ суоххутуй?" диэн ыйытыыга, маны борокуратуура уонна Рослесхоз бэрэбиэркэлииллэрин эттэ. Кини "ыстаакка баар 200 киһи таах сыппат, сезон саҕаланыаҕыттан бүтүөр дылы тохтоло суох үлэлииллэр, кинилэр күүстэрэ тиийбэт буолан, дьону мобилизуйдуубут" диэтэ. Атын эрэгийиэнтэн көмөҕө кэлбит дьон Саха сиригэр баһаары умулларыы улаханнык араастаһар, олус уустук эбит диэн бэлиэтииллэрин эттэ.
Атырдьах ыйын 21 күнүттэн кус көҥүллэнэр, балаҕан ыйын 15 күнүттэн туйахтаахха булт саҕаланар, оттон билигин ойуурга тахсыы бобуллан, ЧС биллэриллэн турарынан, ол көтүрүлүннэҕинэ биирдэ көҥүллэнэрин бэлиэтээтэ.
