Ааспыт нэдиэлэҕэ, Саха сирин социальнай ситимнэригэр эдэр киһини кимнээх эрэ сидьиҥник кырбыы-кырбыы видеоҕа устан ыыппыт устуулара киэҥник тарҕаммыта. Сабаҕалааһын быһыытынан, бу уол сокуонунан атыыга көҥүлэммэт эттиктэри тарҕатыынан дьарыктанар эбит диэн куйаар ситимин туһанааччылара суруйбуттара.
Видеоҕа көстөрүнэн, икки эр киһи эмсэҕэлэччини охсо-охсо кыырыктыйан туран төлөппүөн паролун ыйыталлар уонна кини кимтэн «табаар» атыыласпытын этэн биэрэрин ирдииллэр.
Бүгүн биллибитинэн, Дьокуускай куораттааҕы холуобунай ирдэбил үлэһиттэрин уонна өрөспүүбүлүкэтээҕи наркотиктары утары охсуһар отдел оперативниктарын көмөлөрүнэн, быһылаан бары кыттааччылара быһаарылыннылар, буруйдаахтар тутулуннулар. Икки кырбааччы, биир төлөппүөҥҥэ устааччы уонна эмсэҕэлээччи бэйэтэ.
Өрөспүүбүлүкэтээҕи ИДЬМ пресс-киинэ иһитиннэрэринэн: «Кырбаммыт киһи мэдиссиинэ тэрилтэлэригэр уонна быраабы араҥаччылыыр уорганнарга үҥсүү суруйа кэлэ сылдьыбатах. Тоҕо диэтэххэ, кини бэйэтэ бу иннинэ эрдэ, түөкүннүү дьайыылары оҥорон, саһан, ирдэбилгэ сылдьыбыт».
Билигин, силиэстийэ иннинээҕи бэрэбиэркэ бара турар, туох буолбута сиһилии быһаарыллар.
Суруналыыстарга эрэллээх киһи кэпсээбитинэн, бу быһылаан кыттааччылара бары ханан эрэ эргитэн наркотик биисинэһин кытары ыкса ситимнээхтэр. Кини этэринэн, кырбааһын, атыыга бобуллубут эттиктэри тарҕатар интернет-маҕаһыын сакааһынан буолбут.
