Киирии

Киирии

Cаха сиригэр социальнай бырайыактары олоххо киллэриигэ анаан федеральнай бүддьүөттэн 1,7 млрд солк. тахса үбү көрүөхтэрэ. 2018-2020 сс. Уһук Илиҥҥэ экэнэмиичэскэй сайдыы киининэн буолуохтаах социальнай инфраструктураны тутууга анаан федеральнай киин 53,7 млрд солк. трансферты ыытта. Бу үбү Уһук Илин эрэгийиэннэрэ үллэстэллэр. Бу харчы “Уһук Илини уонна Байкаал эрэгийиэнин социальнай-экэнэмиичэскэй сайдыыта” судаарыстыбаннай бырагыраама чэрчитинэн бэриллиэҕэ.

“Бэриллибит үп социальнай, тырааныспар уонна инженернэй инфраструктураны тутууга, чөлүгэр түһэриигэ, өрөмүөннүүргэ уонна бөҕөргөтөргө анаан туһаныллыахтара. Онуоха федеральнай бүддьүөттэн 2018 сылга — 21,2 млрд солк., 2019 сылга — 16,7 млрд солк., оттон 2020 сылга — 15,8 млрд солк. көрүллүөҕэ”, - диэн РФ Бырабыыталыстыбатын саайтыгар суруллар.

Уһук Илини сайыннарыы министиэристибэтин саайтыгар сурулларынан, Саха сиригэр 7 бырайыагы олоххо киллэрэргэ анаан федеральнай бүддьүөттэн 1,748 млрд солк. тахса харчыны көрүөхтэрэ. Ол курдук, Нерюнгрига оҕо поликлиникатын хапытаалынайдык өрөмүөннүүргэ туһаныахтара. Үөрэҕирии эйгэтигэр ордук суолталаах үс бырйыагы үбүлүөхтэрэ: Дьокуускайга 275 миэстэлээх оскуола, Хаандыгаҕа 220 миэстэлээх Томпо улууһун элбэх многопрофильнай гимназиятын тутуу уонна өрөспүүбүлүкэ 6 тэрилтэтигэр материальнай-тэхэньиичэскэй баазаны бөҕөргөтүү. Маны таһынан, Орто Халыма куоратыгар спорт саалатын туууга харчыны көрүөхтэрэ. Нерюнгри куорат уу-канализация систимин чөлүгэр түһэриини эмиэ былаанныыллар.

Хабаровскай кыраайга 8,8 млрд солк. харчыны 10 бырайыагы олоххо киллэриигэ туһаныахтара. Амыр уобалаһыгар 6 млрд солк. 31 бырайыакка көрдүлэр. Сахалин уобалаһа 95 бырйыагар 25,2 млрд солк. көрдүлэр. Оттон Приморьеҕа 19 бырйыакка 5,1 млрд солк. биэриэхтэрэ. Камчаатка кыраайыгар үс бырайыагы олоххо киллэриигэ анаан 4,7 млрд. солк. биэрдилэр. Магадаан уобалаһыгар 5 бырайыагы олоххо киллэриигэ анаан 600 мөл. солк. көрүөхтэрэ. Еврейскэй автономиялаах уобаласка доруобуйа харыстабылын, култуура, экэниэмикэ 15 эбийиэктэрин тутууга 730 мөл. солк. тахса харчы көрүллүбүт. Чукуоткаҕа икки балыыһаны, 4 техникуму бөҕөргөтүөхтэрэ, итиэннэ спорт былаһаакка тутуллуоҕа уонна табаһыттарга көһө сылдьар мобильнай олорор дьиэлэри атыылаһыахтара. Онуоха 560 мөл солк. тахса үбү көрүөхтэрэ.

 

Тарҕат:

Ырытыы  

Анатолиц
0 Анатолиц 22.06.2018 17:53
Ну нихуя себе алроса
Ответить

Ырытыыгын суруй

Защитный код
Обновить

Бүтэһик сонуннар