“Соҕуруу Саха сирэ” урутаан сайдар территория (ТОР) резиденэ — “Колмар” хампаанньа бөлөҕүн бырайыагар инвестиция 22,8 млрд солк. 44,1 млрд солк.диэри улаатыаҕа.
Бу туһунан РФ Бырабыыталыстыбатын бэрэссэдээтэлин солбуйааччы – РФ Бэрэсидьиэнин Уһук Илиҥҥэ боломуочуйалаах бэрэстэбиитэлэ Юрий Трутнев Уһук Илиҥҥэ инвестиция боппуруостарыгар бырабыыталыстыба хос хамыыһыйатын мунньаҕар иһитиннэрдэ. Бу туһунан биһиэхэ Ил Дархан уонна бырабыыталыстыба пресс-сулууспата биллэрэр.
Хос хамыыһыйа “Соҕуруу Саха сирэ” ТОРга “Колмар” хампаанньа бөлөҕө “Ингалинская-2” шахтаны тутуутун уонна хайаны байытар фабриканы тутуу бырайыактарыгар уларытыылары киллэрии туһунан көрбүт.
“Бырайыагы үбүлээһин улаатан биэрэр: инвестиция 22,8 млрд солкуобайтан 44,1 млрд солкуобайга диэри. Инньэ гынан, сыл устата чоҕу хостооһун билиҥҥи түһүмэххэ 2,7 мөл. туоннаттан 6 мөл. т. диэри улаатар чинчилээх. Онуоха үлэ мисэтэтин таһаарыы эмиэ улаатар”, - диэн вице-премьер тылын тиэрдэллэр.
Уһук Илини сайыннарыы Корпорациятын дааннайдарынан, “Соҕуруу Саха сирэ” ТОРга 15 резидент 110 млрд солк. тахса инвестициялаах бырайыактары олоххо киллэрэллэр. Бырайыак олоххо киирдэҕинэ, 7,5 тыһ. тахса саҥа үлэ миэстэтэ тахсыаҕа.
