Быйылгы «Ааҕааччы хараҕынан» күрэх уратылаах буолла. Ол курдук, күрэх СӨ Бырабыыталыстыбатын бэрэссэдээтэлэ С.В. Местников илии баттаан бигэргэппит Саха Өрөспүүбүлүкэтигэр Төрүт тыл уонна сурук уон күнүн ыытыы бырагырааматыгар киллэрилиннэ. Ол аата күрэх суолтата дьиҥ таһымҥа билиниллэн киэҥ хабааннанан иһэр.
«Ааҕааччы хараҕынан» быйыл үһүс төгүлүн ыытылынна. Амма, Бүлүү, Ньурба, Томпо, Чурапчы улуустарыттан уонна Дьокуускайтан көхтөөхтүк кытыннылар.
Дьүүл сүбэтигэр, олохтоммут үгэс быһыытынан, сабыылаах күрэххэ курдук, ааптара ыйыллыбатах, көннөрү нүөмэрдэммит эрэ суруйуулары сыаналаан үлэлээтилэр: Николаев Егор Револьевич – Арассыыйа Билимҥэ академиятын СС ГЧИуоХААОКИ саха тылын салаатын билимҥэ үрдүкү үлэһитэ, филология билимин хандьыдаата; Санникова Мария Ивановна – «Күрүлгэн» уус-уран сурунаал эппиэт сэкирэтээрэ; Сивцева Екатерина Дмитриевна – С.А. Новгородов аатынан «Айар» национальнай кыһа уран сурукка эрэдээксийэтин эрэдээктэрэ.
Дьүүлдьүттэр киирбит үлэлэри «Ис хоһоон, сиэр», «Тоҕоос», «Тутул, тыырыллыы», «Тыл-өс», «Таба суруйуу быраабылатын тутуһуу» диэн кэриҥнэринэн көрөн бэйэ-бэйэлэриттэн тутулуга суох сыаналаатылар.
Кыайыылаахтарынан буоллулар:
I – Романова Лена Ананьевна, Ф.И. Авдеева аатынан оҕо айымньытын дыбарыаһын педагога (Дьокуускай к.), Наталия Рязанская (Амма) «Күрүлгэн» сурунаалга бэчээттэммит «Оппой» кэпсээнин ырытан;
II – Самсонова Светлана Николаевна-Сиибиктэ, саха тылын учуутала (Кэбээйи, Мукучу), Арчылан С.А. Новгородов аатынан «Айар» национальнай кыһаҕа уонна «Күрүлгэн» сурунаалга бэчээттэммит «Ийэлэриэм, мин кэллим!..» сэһэнин ырытан;
III – Винокурова Светлана Алексеевна-Сырдаана, устуоруйа учуутала (Томпо, Мэҥэ Алдан), Ефросиния Иванова (Бүлүү, Кыадаҥда) «Күрүлгэн» сурунаалга бэчээттэммит «Ийэни туох тохтотуой?!» кэпсээнин ырытан.
Ону сэргэ, дьүүл биһирэбилин ылан, бу сыл устатыгар «Кыым» хаһыат «Кулуһун» уус-уран сыһыарыытыгар эбэтэр «Күрүлгэн» уус-уран сурунаалга маннык дьон туһааннаах анаарыылара бэчээттэниэхтэрэ: Т.С. Евграфова (Дьокуускай) – «Светлана Егорова-Тулуйхаана «Ийэ дьоло» хоһооно»; Е.Е. Иванова (Бүлүү, Кыадаҥда) – «Иннокентий Васильев-Тэгэ «Дьол төннүүтэ» кэпсээнин ааҕан баран...»; С.В. Иванов (Бүлүү к.) «Октябрина Голикова-Ринна Ли «Риччи» кэпсээнигэр рецензия»; М.Н. Кириллина, сэрии сылын оҕото, «Ньурба уоттара» түмсүү чилиэнэ (Ньурба, Өҥөлдьө) – «Дьолуолаах дьолуота үрдүү туруохтун!»; Римма Корякина-Хотууна (Чурапчы) – «Ийэ дьылҕата» (Айсен Кириллин «Тулаайах эмээхсин» кэпсээнин туһунан); С.А. Стручкова, «Аартык» уран сурук түмсүүтүн кыттыылааҕа (Ньурба, Маалыкай) – «Дмитрий Пономарёв-Дьолуолаах «Ийэм барахсан» кэпсээнэ (ааҕааччы анаарыыта)».
Кыайыылаахтары бэлиэтээһин кулун тутар 5 күнүгэр «Ийэ тыл-2024» улахан түһүлгэ чэрчитинэн ыытыллар «Ааҕар Саха сирэ» хамсааһын тэрээһинин кэмигэр буолуоҕа. Тэрээһин Саха тыйаатырын Алампа аатынан саалатыгар 10 чаастан саҕаланар.
Тэрийэр бөлөх.
