АЛРОСА самалык тэрилтэтэ – “Анаабыр Алмаастара” хас да сериялаах “Токо Саһылчаан” диэн сахалыы тылынан таһаарбыт мультигын билиһиннэрдэ.
Мультфильм 2-5 саастаах оҕолорго туһуламмыт. Бырайыагы быйыл кулун тутарга саҕалаабыттар, онуоха 12 киһиттэн турар айар бөлөх уонна саха худуоһунньук-аниматордара үлэлэспиттэр. Сценарийы "Бэлэм Буол+" оҕо хаһыатын үлэһиттэрэ суруйбуттар, оруоллары Айыына Фёдорова, Людмила Хабарова (Тэкэ) Лилия Терентьева (ийэ) Семён Бурнашёв (аҕа) саҥардыбыттар. Ырыаны Уля Ли Фу - Күннэй кырачаан кыыһыгар биһик ырыатын ыллыы олорон айбыт. Саһылчаан эскииһин дизайн уонна технология колледжын талааннаах устудьуона Сергей Варалмов оҥорбут. Бырайыакка "Туймаада" төрөппүттэр сойуустарын бэрэссэдээтэлэ Вилюяна Никитина быһаччы кыттыспыт.
Мультфильмы оҥорооччулар бэлиэтииллэринэн, мультик сүрүн сыала-соруга – аныгы бутуурдаах кэмҥэ оҕолор төрөөбүт тылларын билэллэригэр, үөрэтэллэригэр төһүү буолуохтаах итиэннэ дьиэ кэргэн үтүө үгэһигэр иитэр. Мультк бастакы серията хайыы-үйэ таҕыста - https://youtu.be/4PKy0Ac4jQI.
Бу иннинэ “Анаабыр Алмаастара” атын да култуурунай бырайыактары олоххо киллэрбитэ. Ол курдук, былырыын “Сказки народов Севера” диэн хоту дойду номохторун, үгэстэрин, остуоруйаларын кэпсиир бэртээхэй кинигэни бэлэмнээбиттэрэ.
Быйыл хампаанньа актыбыыстары кытары 6 тылынан (саха, нуучча, долган, эбээн,эбэҥки уонна дьүкээгир) 34 остуоруйаны хомуйбуттар. Хас биирдии остуоруйаны төрөөбүт тылынан устубуттар, ол кэннэ тиэксин нууччалыы тылбаастаабыттар.
