Айсен Николаев: «Тыа хаһаайыстыбата өрөспүүбүлүкэни аһатар таһымҥа тахсыахтаах»

Бүгүн, бэс ыйын 7 күнүгэр, Ил Дархан үгэскэ кубулуйбут суруналыыстары кытта көрсүһүүтэ буолан ааста. Манна судаарыстыбаннайдары кытта чааһынай таһаарыылартан эмиэ сырыттылар. Суруналыыстар Ил Дархан быыбарга кимнээҕи кытта илин былдьаһарыттан саҕалаан Өлүөнэ күргэтигэр тиийэ ыйыттылар. Көрсүһүүгэ өссө кэрэспэдьиэн оҕолор кытыннылар. 

Бэриллибит ыйытыылартан улахан болҕомтону «ыт кыһалҕатын» быһаарар саҥа сокуоҥҥа сыһыаннаах боппуруос ылла. «Ыттары дьаһайар боломуочуйаны регионнарга биэрдэхтэринэ, чопчу туох дьаһаллары таһаараҕын?» диэн ыйытыыга Айсен Сергеевич: «Биллэн турар, Ил Түмэн дьокутааттара ылыммыт сокуоннарынан салайтарыаҕым уонна, бастатан туран, дьон олоҕун инники күөҥҥэ тутуоҕум», - диэн хоруйдаата.

Оттон «Кыым» хаһыат «Кэлэр биэс сылга тыа хаһаайыстыбатын сайдыытын хайдах көрөҕүн?» диэн ыйытыытыгар Айсен Сергеевич:

- Тыа хаһаайыстыбатын, төрүт дьарык эрэ курдук көрбөккө, өрөспүүбүлүкэни аһатар салаа быһыытынан көрүөхтээхпит. Ол эбэтэр, оҥорон таһаарыы технологията, каадырынан хааччыллыы, маркетинг тиһигэ быдан үрдүк таһымҥа тахсыахтаахтар. Кэтэх хаһаайыстыбалаахтарга, биллэн турар, өйөбүл баар буолуо. Ол эрээри, онон муҥурдаммакка, нэһилиэнньэни олохтоох аһынан-үөлүнэн хааччыйар тэрилтэлэри элбэтэ сатыахтаахпыт, - диэн туохха дьулуһуохтаахпытын эттэ .

Анал байыаннай дьайыы кыттыылаахтарыгар сыһыаннаах соҕотох ыйытыыны «Ил Түмэн» бэчээт кыһатын салайааччыта, дьокутаат Мария Христофорова биэрдэ. Кини Дьокуускай куоракка Очиченко 1/1 аадырыска олорор ыалтан дойдуну көмүскүү икки эр киһи барбытын, дьиэлэрэ кыайан толору хааччыллыбакка турарын, онуоха Жилкомсервис тэрилтэ 22 мөл. көрдөөбүтүн иһитиннэрдэ. Ол түмүгэр, бу дьиэ кэргэн кыһалҕата Айсен Сергеевич тус хонтуруолугар киирдэ.

Бэйэ кэр.