«Кыым» хаһыат алтынньы 19 күнүнээҕи нүөмэригэр «Ытык кырдьаҕас» күрэс кыттааччыларын билиһиннэрэн саҕалаабыппыт. Күрэс «Саха сирин рекордун кинигэтигэр» уһун үйэлээҕи булар соруктаах ыытыллыбыта. Онно Мэҥэ Хаҥалас улууһун 100 саастарын ааспыт үс ытык-мааны кырдьаҕаһын кэпсээбиппит. Кинилэр бары Дьабыыл сириттэн төрүттээхтэрин, үһүөн дьикти дьылҕалаахтарын, улуустарын сайдыытыгар сүҥкэн үтүөлээхтэрин билэн сөхпүппүт-махтайбыппыт.
Оттон бүгүн «Саха сирин рекордун кинигэтигэр» уһун үйэлээх быһыытынан киирэр уонна күрэс анал бирииһин ылар кырдьаҕастары биллэрэр күммүт үүннэ. Эрдэ этиллибитин курдук, биһиэхэ 90 сааһын ааспыт сүүрбэ үс уонна 100 сааһын ааспыт биэс ытык кырдьаҕастан сайаапка киирбитэ. Балартан барыларыттан аҕа саастаахтара Ульяна Егоровна Пермякова буолла! Кини Саха сиригэр, чахчы, саамай уһун үйэлээх буоларын туһааннаах уорганнар эмиэ бигэргэттилэр. Онон, уһун үйэлээх быһыытынан «Саха сирин рекордун кинигэтигэр» претендент аатын эрэллээхтик сүктэ!
Маны сэргэ биһиги үйэ саастаах биэс кыттааччыбытын барыларын бэлиэтииргэ быһаардыбыт. Ол курдук, кинилэр «Камелек» маҕаһыынтан аатаах-суоллаах уонна алгыстаах чороон тутуохтара. Бу инники этиллибит Мэҥэ Хаҥалас улууһун үс ытык кырдьаҕаһа: 102 саастаах Ульяна Егоровна Пермякова, 101 саастаах Матрена Егоровна Киренская, 100 саастаах Алексей Николаевич Березкин, маны сэргэ Бүлүү улууһун Баппаҕаайы нэһилиэгин 102 саастаах олохтооҕо Мария Алексеевна Прокопьева уонна Уус Алдан улууһун Бороҕон сэлиэнньэтин 101 саастаах олохтооҕо Матрена Семеновна Гоголева буолаллар. Хаһыаппытын кытта эт саастыы ытык-мааны дьоммутун, сүгүрүйэн тураммыт, истиҥник эҕэрдэлиибит уонна бары үтүөнү баҕарабыт.
СӨ Биэнсийэ пуондатын 08.09.2023 с. дааннайынан, Сахабыт сиригэр 90 сааһын ааспыт 1499 кырдьаҕас уонна 100 сааһын ааспыт 15 кырдьаҕас баар. СӨ Үлэ уонна социальнай сайдыы министиэристибэтин дааннайынан, дьахталларга барыларыттан аҕа саастаахтара 102 саастаах, эр дьоҥҥо – 101 саастаах.
Тэрийэр хамыыһыйа.
