Алтынньы 26 күнүгэр ыытыллыбыт брифиҥҥэ СӨ психологическай киинин дириэктэрэ Владимир Скрябин АБДь кыттыылаахтарын, кинилэр аймахтарын, чугас дьоннорун өйүүр психологическай көмөнү оҥоруу киэҥник ыытылла турарын кэпсээтэ.
Биир нэдиэлэ иһигэр 380 киһи көрдөһүүтэ киирбит, 550 тахса биирдиилээн уонна бөлөҕүнэн көмө оҥоһуллубут. Саамай элбэх үлэ Ростов-на-Дону госпиталыгар СӨ психологическай кииниттэн барбыт мобильнай биригээдэнэн уонна киин писхологтарынан “Аҕа дойдуну көмүскээччилэр” судаарыстыба пуондатыгар ыытыллыбыт.
Билигин Киин үлэһиттэрин өр кэмнээх уонна толору психологическай реабилитацияны ыытарга квалификацияларын үрдэтии оҥоһуллар. Бу үлэ биэдэмистибэлэр икки ардыларынааҕы партнердары уонна федеральнай медико-биологическай ааҕыныстыба боротокуолунан үлэлиир “Бэс Чагда” санаторий реабилитациялыыр киинин кытта ыытыллыахтаах.
Владимир Скрябин Өрөспүүбүлүкэтээҕи психологическай кииҥҥэ психологическай үлэ бары көрүҥнэрин анонимнайдык ааһыахха сөбүн, психолог учуокка туруорбатын, оттон АБДь кыттыылаахтарыгар, аймахтарыгар уонна чугас дьонноругар босхо оҥоһулларын туһунан эттэ.
Итэҕэйии төлөпүөнэ: 8-800-100-35-50. Өссө киинтэн 8(4112) 31-91-09 төлөпүөнүнэн интэриэһиргиир ыйытыыларгытыгар харда ылыаххытын сөп.
Бэйэ кэр.
