Донбастан төннөн иһэн, Москубаҕа урут биһиги “Ситим” медиа-бөлөхпүтүгэр үлэлээбит Айыына Храмованы уонна М.С. Саматойу көрсөн “сахаволонтёрдар” үлэлэрин билистим. СӨ Постпредствота волонтёрдар үлэлииллэригэр усулуобуйа оҥорон биир хоһу биэрбит. Бу хосторун арыйыы сахалыы сиэрин-туомун Щепкин аатынан училищены бүтэрээри сылдьар саха устудьуоннара толорбуттар.
Айыына кыра оҕолордоох, оттон Мария Семёновна биэнсийэҕэ да олордор, ыарырҕаппакка, бааһырбыттарга көмөлөһө сылдьалларыгар киһи махтанар.
Бастаан Украинаҕа байыаннай эпэрээссийэ ыытыллар биричиинэтин кэпсэппиппитигэр Мария Семёновна: “Кэргэним, Украинаҕа төрөөбүт киһи, 2005 c. дойдутугар бара сылдьан, онно дьон-сэргэ букатын буорту буолбуттарын көрөн кэлбитэ. Украинаҕа тэлэбиисэрдэригэр, дьиэлэригэр-уоттарыгар кэпсэтиилэригэр тиийэ туохха барытыгар “москаллар” буруйдаахтар диэн, Арассыыйаны абааһы көрүү бэлиитикэтэ барар эбит этэ. Оҕонньорум ол кэннэ аны Украинаҕа барыллыбат диэн быһаарбыта”, – диэн кэпсээтэ.
Кинилэр Москубаҕа олорбуттара өр буолбут, сиэн көрөөрү кэлэн баран, хаалан хаалбыттар.
Кини салгыы: “Биһиги сыл аайы Кырыымҥа байыаннай городуок аттыгар баар даачабытыгар сайылыыбыт. Быһайын украиналар ыраах тэбэр сэрии сэбинэн ытыалыыллар этэ. Онно олорон биһиги салгынтан саба түһүүнү утары күүстэрбит үчүгэйдик үлэлииллэрин, бэркэ көмүскүүллэрин билбиппит. Өссө “С-300”, бу “Панцирь” ытта диэн, арааран билэр буолбуппут. Күһүн Кырыымтан кэлэн баран, бассаапка волонтёрунан ыҥыралларын көрөн, көмөлөһүөхтээхпин диэн киирбитим. Бэйэм ыраах сиргэ сылдьар буолан, дойду ахтылҕанын билэбин”, – диэн кэпсиир.
Салгыы кэпсэтиигэ Айыына Храмова хамсааһын координатора Т. Константинова этэригэр тирэҕирэн, волонтёрдар меценаттары кытта Арассыыйа үрдүнэн: Москубаҕа, Питергэ, Ростовка, Хабаровскайга, Владивостокка,Читаҕа уо.д.а. куораттарга 300-тэн тахсаларын, Москубаҕа отуччаларын туһунан кэпсээтэ.
Волонтёрдар, сүрүннээн, Арассыыйа куораттарын госпиталларыгар бааһыран сытар Саха сирин байыастарыгар көмөлөһөллөр. Саха сириттэн, Светлана Диодорова-Лаврентьева нөҥүө ас ыыталлар. Киниэхэ махталлара муҥура суох. Дьон эти, балыгы, араас аһы ыыта тураллар.
Салгыы Постпредство ас эмиэ астыыр, ол гынан баран волонтердар күн бүгүҥҥэ диэри бэйэбит ас астаан илдьэрбитин ордоробут дииллэр.
Манна, госпитальга кэлбит бааһырбыт киһиэхэ уларыттарыгар таҥас-сап, күннээҕи туттарыгар суунар-тараанар мал-сал наада. Волонтёрдар бааһырбыттар туох наадатын эппиттэрин хааччыйан, атыылаһан биэрэллэр.
Элбэх саха дьоно волонтёрдар кииннэригэр харчынан көмө ыыталлар. Ол киирэр харчыны Москубаттан кииннээн бары куораттарга ыытан, уолаттар наадыйалларын төлөпүөнүгэр тиийэ атыылаһан биэрэллэр. Биир кииҥҥэ киирбит харчыны Арассыыйа куораттарын госпиталларыгар сытар бааһырбыттарга көмөҕө тутталлар. Отчуокка волонтёрдар атыыласпыт чиэктэрин ыыталлар. Бу уопсай харчыттан сороҕор кэлэр харчылара суох ийэлэргэ билиэт атыылаһан биэрэллэр.
Волонтёрдар сэрииттэн кэлбит, уоппускаҕа баран иһэр саллааттары тимир суол баксаалыгар көрсөн, аэропорка тиийэ атаараллар. Ыараханнык бааһыран, доруобуйалара айгыраабыт саллааттары сөмөлүөккэ олордон ыыталлар.
Волонтёрдар “Якутия” хампаанньаҕа махтаналлар. Хампаанньа бэрэстэбиитэллэрэ ыараханнык бааһырбыт байыаһы аэропорка арыаллаан тиийдилэр да, ытыс үрдүгэр түһэрэн ылаллар, билиэтин, регистрациятын бэйэлэрэ оҥороллор эбит. Кэлээскэлээх саллааттары кыамматтары арыаллыыр сулууспанан сөмөлүөккэ киириэхтэригэр диэри арыаллатан биэрэллэр.
Көмөҕө наадыйар бааһырбыт байыастар ааттарын, сибээстэрин бүгүһүн тэриллибит Биир кэлим координациялыыр киинтэн биэрэллэр эбит. Волонтёрдар ордук үөһэ ахтыллыбыт Щепкин училищетын быйыл бүтэрээри сылдьар устудьуоннарыгар көмөлөрүн иһин махтаналлар. Эдэр дьон күүстэрэ тиийэринэн көмөлөһөллөр, субуотунньуктууллар, гуоспуталларга ас илдьэллэр, уопсайынан, сүрдээх үчүгэй оҕолор дииллэр.
Ити курдук, ыраах сылдьар, олорор саха дьоно тэриллэ, түмсэ охсон, байыаннай эпэрээссийэҕэ өрөспүүбүлүкэлэрин бааһырбыт дьонугар кыахтара тиийэринэн көмөлөһө сылдьаллар.
Владимир СТЕПАНОВ.
