СӨ Бырабыыталыстыбатын бэрэссэдээтэлэ Кирилл Бычков телеграм-ханаалыгар Таатта улууһун Баайаҕа сэлиэнньэтигэр Мандар Ууһу көрсүбүтүн туһунан суруйда.
«Ааспыт өрөбүллэргэ уруккуттан илдьэ сылдьар ыра санаам туолла. Саха култууратын уонна устуоруйатын хараанньыта, улахан уус уонна бөлүһүөк Борис Фёдорович Неустроевы-Мандар Ууһу көрүстүм. Мин киниэхэ удьуортан удьуорга бэриллэр төрүт дьарыкка дьиҥ таптал, бэринии баарын көрдүм. Мандар Уус дириҥ толкуйа, олоххо көрүүтэ, дьоҥҥо сыһыана кэрэхсэтэр уонна үрдүккэ-сырдыкка кынаттыыр», - диэн Кирилл Бычков санаатын үллэһиннэ.
Манна даҕатан, бырабыыталыстыба бэрэссэдээтэлэ саха быһаҕа өрөспүүбүлүкэ брендын быһыытынан аан бастакытын билиниллибитин бэлиэтээтэ. Кини этэринэн, бу олохтоох уустар үлэлэрин көмүскүө уонна төрүт оҥоһук уратытын көрдөрүө.
Сонун төрдө: CӨ Бырабыыталыстыбатын уонна Ил Дарханын пресс-сулууспата
