Бастакы бэрэсидьиэн Михаил Николаев мемориальнай комплексын айыыга архитектуралыы-ойуулуур аһаҕас күрэс түмүктэннэ. Мемориал Хаҥалас улууһун Чапаево сэлиэнньэтигэр үөрэҕирии түмэлигэр тутуллуохтаах.
Күрэскэ идэлээх архитектордар, скульптордар уонна айар бөлөхтөр ааттарыттан барыта 9 сайаапка киирдэ. Дьүүл сүбэтин быһаарыытынан, архитектор Иван Кычкин салайааччылаах "Градо" айар бөлөх кыайыылаах таҕыста.
Бу бырайыак сүрүн уус-уран кэнсиэпсийэтинэн Михаил Ефимович скульптурата буолар. Уобараһы бэрэсидьиэн Өлүөнэ туруук хайаларыгар түспүт хаартыскатыттан ылбыттар. Манна кини лиичинэһин таһыма, өркөн өйө уонна норуокка чугаһа көстөр.
Лиидэр ис күүһэ уонна чулуута үрдүнэн көтө сылдьар хотой уобараһын нөҥүө бэриллэр. Ытык көтөр бэрэсидьиэн аптарытыатын чиҥэтэр уонна Хаҥалас улууһун кытта ситимин бэлиэтиир.
Сонун төрдө: СӨ Бырабыыталыстыбатын уонна Ил Дарханын пресс-сулууспата
