Муус устар 29 күнүгэр Арассыыйа бэрэсидьиэнэ Владимир Путин судаарыстыба уонна норуот иннигэр сүҥкэн үтүөлэрин иһин биэс киһиэхэ Үлэ Дьоруойун аатын иҥэрэр туһунан Ыйаах таһаарда.
Салайар үлэлээх түөрт биллэр-көстөр дьону кытта биһиги биир дойдулаахпыт, олоҕун үрүҥ илгэни үрүлүтүүгэ анаабыт улахан ыанньыксыт ВладимирАфриканович Михайлов аата киирдэ.
Туруу үлэһит өссө сэбиэскэй кэмҥэ, тыа хаһаайыстыбатын сайдыытыгар сүҥкэн кылааты киллэрэн, “Үлэ Албан аата” уордьан толору кавалера буолбута. Маны сэргэ, Арассыыйа Бочуот, Саха Өрөспүүбүлүкэтин “Хотугу сулус” уордьаннарынан наҕараадаламмыта.
Владимир Африканович билигин даҕаны, ынах сүөһүттэн, үрүҥ илгэттэн илиитин араарбакка, тапталлаах Сунтаарын улууһугар “Кириэстээх” кооперативка таһаарыылаахтык үлэлии сылдьар.
Муус устар 30 күнүгэр Ил Тумэн аграрнай бэлиитикэҕэ кэмитиэтин бэрэссэдээтэлэ Андрей Находкин өрөспүүбүлүкэ норуодунай дьокутаттарын аатыттан Владимир Михайловы үрдүк наҕараадатынан – Үлэ Дьоруойа буолбутунан эҕэрдэлээтэ.
