Атырдьах ыйын 11 күнүгэр Дьокуускай куорат баһылыга Евгений Григорьев уонна Өлүөхүмэ улууһун баһылыга Николай Харбин бииргэ үлэлиир сөбүлэҥҥэ илии баттастылар. Сөбүлэҥ сүрүн сыала – Саха сирин улуустарын кытта саҥа сибээһи олохтооһун, бөҕөргөтүү.
– Сөбүлэҥ сүрүн соругун Дьокуускай куорат сиригэр-уотугар бырайыактары бииргэ ыытарга, үлэлэтэргэ туһаайдыбыт. Өлүөхүмэ улууһун дьаһалтатын былаана биһиги былааммытын кытта үгүс маарыннаһар өрүттээх. Илии баттаспыт сөбүлэҥмит элбэх өрүттээх былааны олоххо киллэрэргэ, ол иһигэр бэлиэ күҥҥэ, успуорка, култуурунай-маассабай тэрээһиннэри ыытарга көмөлөһүөҕэ, – диэн, баһылык Евгений Григорьев эттэ.
Өлүөхүмэ баһылыга Николай Харбин бэлиэтээбитинэн, улууска тыа хаһаайыстыбатын бородууксуйатын кээмэйин улаатыннарар сыаллаах-соруктаах үлэлииллэр. Оройуоҥҥа бырамыысыланнас, түүлээҕи оҥорон таһаарыы күүскэ сайдар. Ойуур бырамыысыланнаһыгар эмиэ саҥалыы хардыылар оҥоһуллан эрэллэр эбит.
Сөбµлэ түһэрсии кэмигэр тэрээһин кыттыылаахтара санааларын үллэһиннилэр. Маннык сөбүлэҥнэри түһэрсии икки өттүгэр – улуус да, өрөспүүбүлүкэбит киин куората да – социальнай-экэнэмиичэскэй сайдыыларыгар улахан суолталаах, төһүү буолуоҕа.
Икки баһылык илии баттаабыт сөбүлэҥэ бииргэ үлэлэһэргэ, хардарыта сибээһи олохтуурга, чахчы, кэскиллээх хардыы.
